«Nous duvragn urgent sustign finanzial»

DA GION NUTEGN STGIER / ANR

Sainza sustign finanzial digl mang public savess igl bogn sarar las sias portas. Da chegl èn er igls cumegns Albula/Alvra scu cumegn territorial digl bogn ed igls oters cumegns tgi totgan tar igls acziunaris dalla Bogn Alvagni SA persvadias. Hans Christoffel, igl iniziant e grond investour digl bogn ad Alvagni Bogn, è betg ena persunga tgi sa lamainta savens. Ossa seia er el pero schinavant, pertge cun las finanzas dalla Bogn Alvagni SA veigl or tot oter tgi bagn, ò menziuno igl impressari da Tavo. Per star sur l’ava dovra la societad urgent sustign finanzial digl mang public. Sainza chel vess el pi prubabel da sarar igl bogn, chegl tgi faschess fitg mal, dei igl om dad 83 onns. El ed er la sia famiglia seian betg ple pronts da surpiglier ulteriours deficits digl travagl da bogn. Igls davos onns seia sto pussebel da manar igl menaschi da bogn angal cun aveir la famiglia Christoffel mess ainten la societad acziunara ple tgi dus milliuns francs.

An diesch onns en deficit 
da 2,1 milliuns francs

La raschung pertge tgi vo betg bagn alla Bogn Alvagni SA è tgi cun sa redutgier siva digl 2002 igl domber dallas persungas tgi von a far bogn dad 83 000 sen ple tgi la mesadad pi pac. A madem mument è er igl stgamgiamaint sa redutgia dad 1,2 milliuns francs sen 600 000 francs. Christoffel dei tgi igls davos onns seia er betg ple sto pussebel da paer anavos la somma annuala da passa 200 000 francs digl credit d’investiziun agl uffezi da turissem ed economia «ATW». Siva digl 2010 ò la societad fatg cugl bogn en deficit da 2,1 milliuns francs. Ultra da chegl ò ella da preschaint er dabets per ena somma da 3,4 milliuns francs. Christoffel spera tgi igls cumegns vegian tgapientscha e sustignan la societad acziunara finanzialmaintg. Igls dus davos onns ins vegia introduia plessas maseiras da spargn per betg neir anc pi fitg ainten las cefras cotschnas, ò managea igl «bab» digl bogn an Val Alvra. Redutgier igls taimps d’avertura porta bagn ensatge, serva dantant betg a giast ed indigens.

17 onns commember 
digl cunsegl administrativ

Igls 25 acziunaris preschaints on er gia da reeliger igls commemebrs digl cunsegl d’administraziun dalla Bogn Alvagni SA. Sa retratg da chel gremi è siva 17 onns Christian Simeon d’Alvagni. An chels onns seia el sto fitg activ, el vegia luvro serious e sa mess aint fitg per la societad, ò detg Hans Christoffel. Pigl commember partent digl cunsegl d’administraziun on igls preschaints eligia Christian Mark da Barvogn. Reeligias èn nias per chel gremi Filip Dosch, Cunter, Martin Deplazes, Tavo, Rico Liesch, Brinzauls, Luzi C. Schutz, Filisour e Leo Thomann, Parsonz. President resta scu gio siva digl 2002 Hans Christoffel, Tavo.

Cattar ena soluziun 
raschunevla

Dalla gronda muntada digl bogn d’Alvagni Bogn per la regiun eran er igls represchentants digls cumegns acziunaris tg’eran agl li tar la radunanza generala dalla societad. Per Leo Thomann, igl mastral digl cumegn Surses, e Rico Liesch, igl vicemastral digl cumegn Albula/Alvra, tots dus er commembers digl cunsegl administrativ dalla Bogn Alvagni SA, è evident tgi igl bogn seia da gronda valour per l’antiera regiun. An ena moda u l’otra seia da sustigneir Christoffel, cun la speranza tg’el sera betg igl bogn. Sen meisa seian plessas propostas per sustigneir davart digls cumegns la societad acziunara, on detg Thomann e Liesch. Anc ins seia an discurs cun Christoffel e perchegl ins viglia betg communitgier daple. Per Luzi C. Schutz, igl mastral digl cumegn Barvogn Filisour, è per sasez tgi resta navot oter tgi da sustigneir la societad acziunara digl bogn. «Da cattar è ena soluziun raschunevla», accentuescha Schutz. Vess igl bogn da sarar las sias portas fiss chegl ena gronda sperdita per la regiun, ò detg Tanja Amacher, la directoura da Turissem Savognin Beiva Alvra. Gist per deis da treid’ora mantgess ena buna alternativa schi dess betg ple igl bogn d’Alvagni Bogn.