Giasts predschan ils prodots indigens i’l BES

Da Flurin Andry / ANR

Duos evenimaints han dat la taimpra a l’on 2018 da la BES SA: La restructuraziun da las gardarobas e da prümavaira la festa pel giubileum da 25 ons Bogn Engiadina Scuol. «La situaziun difficila dal marchà turistic s’ha remissa ün pa dürant l’on da rapport», manzunan Gion J. Fravi, il president dal cussagl administrativ, e Gerhard Hauser, il directur da la Bogn Engiadina Scuol (BES) SA, i’l rapport annual. «Listess vaina stuvü registrar, impustüt pervi da la serrada dal bogn per las lavuors da revisiun, üna diminuziun dal schmertsch cha no nu vain plü pudü cumpensar dürant l’on.» Sco cha Fravi e Hauser constatan influenzeschan las pernottaziuns illa regiun directamaing las entradas dal BES.

Renovà il BES ed optimà 
l’efficacità energetica

Per l’import da var 2,5 milliuns francs es gnü renovà l’on passà il BES. «Da prümavaira 2018 vaina müdà cumplettamaig l’uscheditta cuntrada da las gardarobas», infuorma Hauser e disch ch’ellas correspuondan uossa darcheu als bsögns ed a las aspettativas dals giasts dal bogn a Scuol. «No vain pudü introdüer la pussibiltà da pajar, cun agüd d’ün chip, sainza munaida bluotta», cuntinuescha’l. Eir ün giavüsch cha’ls giasts dal BES vaivan express repetidamaing han ils respunsabels dal bogn pudü accumplir: Illa cuntrada da bogns e sauna daja uossa üna sporta cun differents prodots regiunals frais-chs. «Plünavant vaina realisà masüras da mantegnimaint e da renovaziun in differents sectuors dal BES, p. ex. illa cuntrada da bogns e da las saunas, ma eir i’l bogn roman-irlandais ed i’l center da terapia», disch il directur Hauser. Alch chi til fa plaschair es chi s’ha eir pudü cuntinuar ad optimar inavant l’efficacità energetica.

Festa pel prüm quart 
tschientiner

Eir l’on passà da prümavaira ha il Bogn Engadina a Scuol pudü festagiar seis giubileum da 25 ons: Als prüms marz da l’on 1993 vaiva drivi il BES sias portas. «Var 5,5 milliuns giasts han fat dürant quist quart tschientiner adöver da nossas sportas», vaiva dit il directur Hauser l’on passà in mai a chaschun occasiun da la festa da giubileum, «quai correspuonda ad üna media quotidiana da 600 giasts.» Preschaint a quist arrandschamaint festiv d’eira stat eir cusglier guvernativ Jon Domenic Parolini chi deriva da Scuol. L’incumbenza da moderar la festa vaiva surtut Flurin Caviezel, oriund da Ramosch.

Per consequenza 
a la serrada dal bogn

Illa cuntrada da bogns e saunas han dombrà ils impiegats dal BES l’on passà 167 385 entradas. Quai sun 7,1 pertschient damain co l’on precedent. «Il motiv es impustüt la serrada dal bogn dürant set eivnas per til reveder», declera il directur. I’l bogn roman-irlandais s’haja dombrà dürant l’on passà 7338 entradas, quai sun 1081 entradas damain co l’on avant. La radschun es eir qua il temp cha’l BES d’eira serrà pervi da la revisiun. «Uschea s’haja fat in quists duos sectuors s’inclegia ün plü pitschen schmertsch co l’on avant», disch Hauser, «adonta da quai vaina pudü realisar ün grà da cuvrida leivmaing positiv.» Il rechav da gestiun da l’on 2018 importa 3,79 milliuns francs, quai sun var quatter pertschient damain co l’on avant. Tant ils cuosts da persunal da 2,98 milliuns francs (+4 pertschient) sco eir ils cuosts da gestiun dad 1,45 milliuns francs (causa revisiun +25 pertschient) sun plü ots co l’on avant. In basa a la cunvegna da prestaziun paja il cumün da Scuol la contribuziun maximala dad 1,85 milliuns francs, tant chi resulta ün deficit da s-chars 176 000 francs.

Il directur surdà la bachetta

In venderdi saira salva la Bogn Engiadina Scuol SA i’l local cultural dal BES la 17avla radunanza generala ordinaria. Davo la radunanza as preschainta cuort Claudio Duschletta chi dvainta al principi dal prossem on il nouv directur dal BES. Davo set ons a la testa da quel surpiglia seis antecessur Gerhard Hauser nouv la direcziun da la sparta «servezzans» dal Center da sandà Engiadina Bassa (CSEB): «L’on passà vaina sviluppà inavant la collavuraziun pro’ls servezzans interns suot il tet dal CSEB.» Las partiziuns da las finanzas, dal persunal, da la tecnologia d’infuormaziun IT e da la lavandaria chi sun, sco ch’el disch, domiciliadas tuottas i’l Ospidal lavuran eir pel BES. «E las partiziuns da la tecnica, dal mantegnimaint e dal marketing, chi’s rechattan i’l BES, lavuran eir per tschellas gestiuns dal center da sandà regiunal», conclüda Hauser.