Project San Gottardo 
duei cuntinuar

Da Hans Huonder / anr

La fin da quest onn vegn in’ulteriura perioda da realisaziun dil Project San Gottardo terminada. Las preparativas per la prolungaziun d’ulteriurs quater onns vegnan terminadas sin la fin da fenadur. Sco quei ch’ils responsabels pil Project San Gottardo scrivan en lur bulletin da novitads va la perioda da quater onns a fin quest onn. Per saver prolungir quei engaschament davart il maun public pretenda il Secretariat statal per economia (Seco) dils cantuns pertuccai – Uri, Grischun, Tessin e Valleis – in’intenziun e strategia communabla en vesta ad ina nova perioda da quater onns da quei project che sebasa silla Nova politica regiunala dalla confederaziun. Alla seduta dallas quater regenzas il schaner 2019 ein ils principis strategics per ulteriurs quater onns vegni tractai. Alla giunta directiva dil PSG 2020 ei vegniu dau l’incarica da realisar il program e da suttametter quel per approbaziun als cantuns. Ensemen culs acturs regiunals ein differents projects ed ideas vegni discussiunai. Las experientschas fatgas ils davos onns ein medemamein flessegiadas ellas ponderaziuns pil futur. Dapresent sesanfla il program pils onns 2020 entochen 2023 ella fasa finala dall’elavuraziun. La finamira ei da saver suttametter el entochen la fin da fenadur 2019 al Seco. Ils davos quater onns han entgins gronds projects saviu vegnir susteni sin fundament dil program.

Pagina 3