Recepziun remarcabla da giuvens burgheis

da claudio WIlli / MC

La fiasta da recepziun da giuvnas burgheisas e giuvens burgheis che han contonschiu la maiorennitad politica ei a Domat tradiziun. Giuvenils che cumpleneschan egl onn calendari lur 18avel anniversari vegnan envidai alla radunonza dil cussegl da vischnaunca nua ch’il document da burgheis giuvens vegn surdaus. All’entschatta dalla serada ein ils giuvenils vegni introduci el sistem politic communal entras il president dil cussegl da vischnaunca Daniel Meyer (pps) e dalla scarvona communala Yvonne Müller. Silsuenter ei la sesida dil cussegl da vischnaunca (parlament communal) suandada, alla quala ils 16 novs burgheis giuvens han assistiu sco aspectaturs interessai.

Per il start 
en scoletta

Sin la gliesta da tractandas figurava la creaziun d’ina plazza per in program da promoziun tumpriva per la vegliadetgna prescolara, ina proposta ch’ei vegnida beneventada generalmein, ch’ha denton tuttina evocau damondas criticas. Ei seigi necessari da promover las cumpetenzas socialas, ha la scheffa dil departament Silva Bisculm Jörg declarau. Jürg Rodigari (pld) semuossa tuttina surstaus dils deficits che seigien apparentamein avon maun tier l’entrada en scoletta sch’els disponien buca dallas habilitads las pli fundamentalas sco sevestgir ed ir sin tualetta persuls ni ir entuorn cun ina forsch. Il project che vegn offerius als geniturs cun lur affons duei gidar a migliurar las cumpetenzas socialas. Sche quei seigi il pensum dalla scola ni biaronz dils geniturs, ein ins sedumandaus? Ella votaziun finala ei il cussegl denton suandaus unanimamein la proposiziun dil messadi approbond da crear per quei intent ina plazza dotada cun 10 pertschien per lantschar quei project da pilot cugl intent da facilitar a tuts scolarets in bien start ella scoletta.

Consequenzas dalla refuorma 
da taglia sin interpresas

Entradas ein treis intervenziuns parlamentaras, dallas qualas l’interpellaziun d’Ursin Fetz (pcd) ei vegnida declarada per urgenta. Ella stat en connex culla refuorma dalla taglia sin interpresas ch’ei vegnida acceptada dil pievel e dalla quala la vischnaunca industriala da Domat ei fetg pertuccada.

Cheu setracti ei da s’engaschar per ina varianta moderada el rom dalla tractaziun dalla fatschenta el cussegl grond. Il president communal Erich Kohler ha informau che Domat stoppi quintar en consequenza dalla decisiun da reducir la taglia sin gudogn d’interpresas per tschun sin quater pertschien cun entradas reducidas da rodund 2,1 milliuns. Previdas seigien denton era entradas supplementaras per ils cantuns ed el presumeschi che las vischnauncas pertuccadas vegnien cumpensadas cun entgins tschiens mellis francs, aschia che Domat mitschassi «cun in egl blau».

Dretgs ed 
obligaziuns

Cun contonscher la maioriennitad civila dil 18avel onn detti ei buca mo libertads, anzi, ei setracti era da surprender responsabladad, ha il president communal Kohler (pcd) declarau en sia allocuziun drizzada als giuvenils.

Ad els ei vegniu surdau il document da giuvens burgheis ed in pign regal en fuorma d’in apparat «da banca power» che lubescha da cargar dapertut energia per il smartphon.

Sco pensum special ein la giuvnas burgheisas ed ils giuvens burgheis vegni envidai da cooperar alla formulaziun dil maletg empalont dalla vischnaunca, quei ch’ei lu era succediu en discuors en gruppas ed aschia era promoviu il contact denter ils burgheis giuvens e las autoritads communalas.

Per conclusiun dalla serada ein ils presents stai envidai al bein meritau aperitiv ch’ei vegnius accumpignaus musicalmein dil duet da Domat «Sun da crodas» cun Sepp Sgier e Mirjam Saxer.