Baselgia – Tgierp da Cristus

da Sur Marcus Flury, Glion

Egl onn 494 a. C. han a Ruma ils Plebeis, pia il sempel pievel, bandunau il marcau e mo schau anavos ils Patriciers, pia ils rehs e signurs. Menenius Agrippa ei ius tiels Plebeis ed ha raquintau ad els la suandonta fabla: «Ils members dad in tgierp ein sevilentai ch’els tuts stuessien luvrar per il magun. Els tuts duessen rabitschar neutier da magliar per el, ferton ch’el ei enamiez il tgierp e selai mo survir. Aschia han els decidiu ch’ils mauns meinien negina spisa tier la bucca, ils dents mordien e mustegien nuot pli. Gia suenter cuort temps han ils members stuiu constatar che lur forzas svaneschan perquei ch’il magun survegn negina spisa pli. Per buca stuer murir da fleivlezia han ils members puspei dau si lur plan ed han procurau vinavon per spisa.» Agrippa ha aschia saviu perschuader ils Plebeis da puspei turnar anavos el marcau.

S. Paul ha pli probabel enconuschiu quella fabla, pertgei era el pren quei maletg dil tgierp per declarar il misteri dalla baselgia. El di: «Sco il tgierp ei mo in ed ha tonaton biara membra, e sco tut la membra dil tgierp fuorma malgrad sia pluralitad mo in tgierp, aschia era Cristus» (1 Cor 12, 12–30).

Sco ei para dev’ei a Corint members dalla pleiv che sesentevan danvonz perquei ch’els vevan buc ils duns dils quals auters segloriavan. Ad els di s. Paul: Vus tuts s’udis tier la pleiv. Negin ei danvonz. Tgi che segloriescha cun ses duns e mira da surengiu sin auters fa negin survetsch alla cuminonza.

Corint ei dapertut. En mintga cuminonza dat ei carstgauns cun sentiments d’inferiuradad che patratgan: Jeu sun mo jeu. Jeu hai buca duns sco il auters. Ad els di s. Paul: Igl ei falliu da semesirar cun auters. Tuts ein impurtonts sch’els sestentan per igl entir tgierp entras viver en lur situaziun da veta cun lur duns e habilitads el spért da Cristus.

Quei carstgaun cun il dun dil humor ei impurtonts, medemamein quel cun il dun da consolar ni da dar curascha. Era sch’enzatgi ei en ina crisa interna, sche quella persuna ha breigia dad urar e da ver fidonza en Diu, sche astga ella saver che l’oraziun dall’entira pleiv vul era sustener ella. Quei ei solidaritad vivida, ton per igl agid spiritual sco era corporal.

Sch’ins pren serius quei model da baselgia da s. Paul, lu eis ei bi da viver en ina cuminonza cristiana. Mo el medem mument duess quei era intimar da s’engaschar en quella cuminonza cun quels duns ch’ins ha. Lu serealisescha in vegl plaid che vegneva detg al pievel avon la s. communiun: «Retschevei quei che vus essas e seigies quei che vus retscheveis: Tgierp da Cristus.»