Campell: Mademas pussaivladads 
era per quels da passa 50 onns

(cp) En sia moziun pretenda cusseglier naziunal Duri Campell dal cussegl federal da dismetter ils dischavantatgs per la generaziun pli veglia en la lescha davart la prevenziun professiunala e d’introducir ina tariffa unitara pertutgant las bunificaziuns da vegliadetgnas. La moziun è vegnida approvada unanimamain dal cussegl naziunal a chaschun da la sessiun dal zercladur. Il dischavantatg da lavurantas e lavurants pli vegls è ina realitad sociala nungiavischada. Impuls fallads mainan a quella che dunnas ed umens da passa 50 onns n’han numnadamain betg pli schanzas adualas a generaziuns pli giuvnas da sa preschentar sin il martgà da lavur. Ina causa essenziala per quai sa chatta en las bunificaziuns da vegliadetgna creschentas, las qualas vegnan purtadas mintgamai a mesas dal patrun e da lavurantas e lavurants e ch’han per consequenza la «chareschia» cuntinuada da las forzas da lavur pertutgadas.

Era la terza conferenza pertutgant il tema «Forzas da lavur pli veglias» n’ha purtà nagina soluziun. Ed en il rom da la «refurma vegliadetgna 2020» èn vegnidas unfridas meglieraziuns pussaivlas a las cuntraversas tranter ils aderents da dus concepts differents. «I n’è oramai anc adina betg en vista ina soluziun, dafertant che las preoccupaziuns en quest connex creschan cuntinuadamain», di Duri Campell. «Igl è damai il pensum dal cussegl federal da procurar per schanzas adualas e d’abolir il dischavantatg sistematic da lavurantas e lavurants pli vegls.»

Cun introducir ina tariffa unitara pertutgant las bunificaziuns da vegliadetgna vegn resguardada questa pretensiun senza restricziuns. Ils custs supplementars chaschunads entras questa midada vegnan purtads sco usità a mesas dals patruns e da lavurantas e lavurants. Quai maina a la distgargia da las generaziuns pli veglias – e per entant – betg a chargias supplementaras da las generaziuns pli giuvnas. Uschia perencunter vegn cuntanschì giustia tranter las generaziuns, e las generaziuns pli giuvnas profiteschan er ellas a lunga vista da l’effect anticipà da las bunificaziuns da vegliadetgna pli autas e medemamain da las schanzas meglieradas sin il martgà da lavur en lur vita professiunala futura. La moziun da Campell è vegnida approvada cun 165 vuschs en sia favur e 0 cuntervuschs.