Scamond da remar el Glogn

(mc) El Glogn denter la Val da Riein e la sbuccada el Rein anteriur ha la vischnaunca dad Ilanz/Glion scumandau da remar cun canus e barcas pneumaticas. En consequenza dallas grondas plievgias dallas davosas jamnas ei la via provisoria ch’ei vegnida contruida en connex culla sanaziun dallas duas gallarias dalla Via da Val vegnida donnegiada grevamein. Las auas grondas han era menau naven ils blocs da betun ch’eran vegni deponi leu interimisticamein. Il fier armau da quels blocs che sesanflan el letg dil Glogn muntan uss in grond prighel per ils remaders che vulan remar dil Glogn viadora.

Per motivs da segirtad san ils gronds blocs da betun armau che sesanflan uss el letg dil Glogn vegnir allontanai sil pli baul en dus meins, damai ch’il Glogn meina actualmein aua gronda e damai che la niev liua uss cun ried els aults. L’interpresa incumbensada culla lavur vegn ad allontanar ils blocs da betun aschiprest che l’aua tschessa empau. Entochen che quei ei aschi lunsch vegn la Scola da canuts da Versomi a traversar il Glogn cun ina lubientscha speciala per eruir ils loghens neuralgics.

Informaziuns actualisadas sut:

https://www.rivermap.ch/hinweise.