In premi pil hotel Pazzola

(anr/hh) Il hotel Pazzola a Mustér ei vegnius undraus cul «Travel and Hospitality Award». Pils meinafatschenta Lilly e Christian Schulz ei quei gia ina secunda undraziun dapi ch’els han surpriu il hotel avon dus onns. Igl onn vargau han els numnadamein obteniu il «Booking Award.» Il secund premi ch’els han retschiert dacuort ei ina renconuschientscha che vegn surdada a menaschis dalla branscha da viandar e vacanzas per la gronda lavur che vegn prestada e pil success. Il premi dedicaus a hotels, organisaturs da viadis, commerciants ed influencers sin tuts continents vegn surdaus sco meret per la cuntentientscha dils hosps sur plirs onns. Hosps internaziunals, respectivamein organisaturs da viadis, giudicheschan il hotel en ina fuorma individuala. Els fan quei sin fundament dalla cuntentientscha dils hosps concernent qualitad, purschida, relaziun da prezi e prestaziuns sco era servis, infrastructura e surtut era pervia dalla capientscha, respectivamein ils lungatgs. Lilly e Christian Schulz tschontschan ensemen buca meins che tschun lungatgs: tudestg, engles, franzos, spagnol e russ. «Nus selegrein fetg da quei premi. El ei in segn da renconuschientscha per nossa prestaziun e muossa che nus havein ina buna relaziun da prezi e prestaziun», dian ils meinafatschenta dil hotel Pazzola. Savend ch’in publicum internaziunal detti aschi bunas notas detti secapescha gronda motivaziun. Cura ch’els han surpriu il menaschi avon dus onns vegneva quel menaus sco lodge, uss eis ei in hotel ella categoria cun treis steilas S. Lilly e Christian Schulz che meinan il hotel persuls cun pign agid persunal porschan en tut 35 letgs sco era in restaurant cun rodund 40 plazs. Quel ei aviarts la sera naven dallas 18.00 era per hosps d’ordeifer il hotel, denton mo sin reservaziun. Duront la stagiun aulta ei il menaschi aviarts mintga di. Tenor ils meinafatschenta duei il confort dil hotel vegnir augmentaus vinavon. Aschia eis ei previu da renovar las combras da durmir.