18 000 alarms

(anr/abc) Avon 20 onns han ins priu en funcziun en il Grischun ina numera da telefon speciala. Il clom d’urgenza 144 ha entschiet a Glion in survetsch per l’intervenziun immediata. Dapi il november 2017 ei la centrala a Cuera. La midada a Cuera ha evocau protestas ed ins ha deplorau quei en Surselva. Il cantun ha denton stuiu scriver ora il 2016 da niev l’incarica. Oriundamein haveva il Spital regiunal Surselva surpriu quella cun in contract illimitau. Daferton ein las directivas dallas submissiuns entradas en vigur ed il cantun ha stuiu metter en concurrenza la lavur. Dapi ch’ins ha priu en funcziun igl onn 1999 la centrala dil clom d’urgenza sanitar 144 ei bia semidau ed il svilup buca sefermaus. Sco quei che cusseglier guvernativ Peter Peyer, il schef dil Departament da giustia, polizia e sanitaresser dil Grischun, ha confirmau ier a caschun dalla conferenza da medias ei la dislocaziun da Glion a Cuera secumprovada.

Lavur pretensiusa e varionta

Dapi ils 7 da november 2017 ei la centrala dil clom d’urgenza sanitar 144 tier la polizia cantunala alla Ringstrasse 2 a Cuera. La dislocaziun da Glion a Cuera ei buca stada drizzada encunter la regiun. Ella hagi giu motivs spirontamein pratics. Oz seigi il survetsch dil clom d’urgenza 144 pli efficients e sperts. Polizia e disponents dil 144 ein el medem baghetg, ins sappi nezegiar sinergias, il problem dalla munconza da persunal seigi sligiaus.

Il giubileum da 20 onns dil clom 144 han igl uffeci da sanadad e la polizia cantunala priu sco motiv per render attent all’impurtonza ed als aspects actuals da quei survetsch. Sco quei ch’il menader dalla centrala, Sergio M. Calabresi, ha informau retscheiva la centrala mintga gi rodund 110 telefons, e quei 365 gis ad onn. Endisch persunas lavuran a Cuera ella centrala dil 144. Igl ei disponents e specialists d’alarmaziun. Mintgin sto esser habels d’agir e funcziunar immediat. Sco quei che la collaboratura Monika Juric ha declarau eis ei ina lavur pretensiusa e varionta. Ils disponents salvan e spendran veta, els ston esser movibels e restar ruasseivels en mintga situaziun. Hectica e stress dat ei numnadamein mintgagi ella centrala dil 144. Dils rodund 40 000 telefons che entran en in onn differenziescha la centrala vers cloms d’agid cun persunas ch’ein en prighel da veta. Glieud cun attaccas dil cor, accidents da sport e professiunals, glieud che drova urgentamein in miedi ni medicaments: Mintga cass ei auters e pretenda in tgau clar e l’acziun cun disposiziun correcta.

Alarmaziun cun «Echo 112»

Avon 20 onns fuvan las pusseivladads aunc limitadas. Ella centrala a Glion stuevan ils disponents alarmar tuts survetschs independentamein in da l’auter. Oz ei la tecnica electronica sesviluppada talmein che mintga possessur d’in telefonin sa cargar sin quel in’applicaziun, respectiv in «nuv» pil clom d’urgenza 144. La centrala a Cuera lavura culla tecnologia «Pelix» per l’intervenziun sperta. Igl ei l’applicaziun «Echo 112». El cass d’urgenza transmetta quella app sigl entir mund la posiziun dalla possessura ni dil possessur dil telefonin. L’applicaziun gratuita «Echo 112» sa mintgin cargar giu dall’«App Store» ni da «Google Play».

Il schef dalla centrala 144 ha mussau ier als representants dallas medias la gronda sala culs plazs da lavur dils disponents. Las sfidas ein buca vegnidas pli pintgas ils davos 20 onns. Igl ei ina localitad gronda cun massa moniturs. Mintga collaboratur ha silmeins quater tals. Arriva in clom sto el agir tenor in schema cun in program da damondas. Impurtont eis ei da saver rispunder las damondas tgi, nua, tgei e contas persunas ch’ein involvidas. Pils pertuccai eis ei in bien sentiment da saver ch’ins ei colligiaus cun glieud scolada e cumpetenta. Ils disponents instrueschan tgei ch’igl ei da far entochen ch’igl agid sil plaz arriva. Els restan ruasseivels, declaran e quieteschan las persunas pertuccadas ed il contuorn. En scadin cass ein ils endisch collaboraturs colligiai culs survetschs d’urgenza dalla polizia, dils pumpiers, dils miedis da pichet. Era la centrala dil Care Team ed il helicopter dalla Rega s’audan tier la reit d’alarmaziun. Sco quei che Calabresi ha declarau presta la centrala era survetsch per clients. Per exempel san ils biros dalla spitex schar sviar duront la notg lur telefon silla centrala dil 144.