Ferms urizis 
ed uradis

Ils meteorologs han admonì e gia vers mezdi eran els qua: Temporals ed uradis ferms che passan sur il Grischun or. Uschia vegn rapportà da granella a Surrein u dad in ferm temporal ch’è passà sur mezdi da Domat sur Cuira or en direcziun Signuradi. Er en autras parts dal Grischun haja dà per part temporals intensivs – uschia per exempel en la regiun da S-charl ed il nord da la Val Müstair u giu da la Surselva. Oz e mesemna datti in mix da sulegl e nivels. Localmain èsi da quintar cun uradis. A Cuira datti radund 26 grads.

A Muster èn var 500 chasadas stadas il glindesdi suentermezdi senza electricitad. Sco la Repower ha communitgà hajan ferms urizis vers mezdi chaschunà l’interrupziun. Ina part dals clients pertutgads hajan entant puspè forza electrica, scriva la Repower. Las lavurs da reparatura duessan esser terminadas ier saira.

Cun 1400 visitadras e visitaders è la 10avla ediziun da la «Viamala Schlagernacht» stada in success. Quai èn 300 persunas dapli che l’onn passà – ma tuttina va a fin l’istorgia da l’occurrenza da schlaghers. Ils organisaturs da la notg da schlagher èn cuntents cun il dumber da visitaders, uschia ch’i avess da resultar ina nulla naira, ha ditg Peter Bosshard, il president dal comité d’organisaziun. Tuttina saja quai stada l’ultima ediziun da la «Viamala Schlagernacht». Sco raschun numnan ils organisaturs pretensiuns adina pli autas e la mancanza da sustegn finanzial da la vart dal chantun, uschia ch’i saja grev da cuvrir ils custs a lunga vista. Plinavant dettia adina dapli occurrenzas da schlagher che sa concurrenzeschian.