Viva la musica populara

DA GION NUTEGN STGIER / ANR

En’ambianza grondiousa, en public incanto e musica tg’ò laschea daventar l’occurrenza ena veira aventura musicala. Attratg la pi gronda simpateia digl public on la «Huusmusig Kollegger» e la capella «Martegnas». Durant treis deis è la veia tras Filisour stada sarada la davosa fegn d’emda pigl traffic. La raschung persiva è tgi segl program è sto scu mintg’onn igl «Filisurer Dorffest». La culissa giond tras las giassas da Filisour vess betg savia esser pi bela, èn las tgesas an stil engiadines bagn veirs bischus. Eida a fegn è la festa da vischnanca a Filisour cugl de dalla musica populara organiso digl Parc Ela. Furmaziuns indigenas on attratg dumengia passada blera gliout a Filisour e chegl tiers las temperaturas prest tropicas. Tranter igl auditori era forsa betg angal gliout pi segls onns, na, er anc bleras persungas giovnas. Musica populara è oz puspe «in» e chegl er tigl public pi gioven.

Ena veira «show»

Egna dallas culminaziuns digl de dalla musica populara è stada cura tgi la «Huusmusig Kollegger» è stada sen tribuna. Gist er perveia da chella furmaziun da famiglia è igl public nia an rotscha. Igl auditori ò betg savens la caschung d’esser dalla parteida ad en’occurrenza tgi tots musicants e tottas musicantas dalla capella da famiglia sungan an cuminanza e chegl anc per mintgign. Eneda daple è sa musso tge qualitad da musica tgi igls «Kollegger’s» fon, tge abilitads musicalas tgi mintgign dalla capella ò e quant vasta tgi la purscheida da musica è. Dasper la musica dalla classa superioura ò Andy Kollegger er rachinto l’egna u l’otra anecdota succedeida siva digl 1977. Chel onn ò antschet l’istorgia da success dalla «Huusmusig Kollegger». Igl repertori suno tigl de dalla musica a Filisour è sto multifar, tradiziunal e folcloristic. Bler applaus ègl cunzont er do pigls solists tg’on fatg musica cun scalots, ena rezgia e perfign cun palottas e sdoms. Totpiglia en tagl musical cun las pi belas melodias tg’ins canoscha dalla musica populara.

Suno cun ena exactezza

En ulteriour deletg musical è sto igl concert dalla capella «Martegnas» da Savognin. Cun chella sungan musicants e musicantas dalla Musica Instrumentala Savognin. Detg pi exact l’elita da chella musica da vischnanca. Cun gizzar bagn las ureglias è dalunga sto pertschert tgi mintgign sen tribuna ò en dung aparti da far la pi bela e fegna musica e da sunar cun ena exactezza. Sunadas èn betg angal neidas cumposiziuns tradiziunalas, mabagn ò igl repertori er cumpiglia hits da rock e pop, «evergreens» e belas ovras dalla musica classica. Igl public ò remunero la prestaziun digls otg musicants e dall’unica musicanta cun en ferm applaus.

Ena buna 
simbiosa

Bela musica on alloura er fatg igls «Sepplis da Bravuogn». Chella furmaziun tgira cun grond chito la musica digls «Fränzlis» e lascha reveiver ella an ena moda plagn calour. Per varsaquants tocs è la furmaziun s’uneida cun tschintg flautistas dalla Val Alvra e sa do è ena simbiosa da musica tg’è stada ena belezza, scu igl «azur» digl tschiel da dumengia passada.

Sa preschentadas agl auditori èn alloura er anc otras gruppas da musica, seia chegl chella da sunatibas da Werner Erb, dalla Val Tuors u er la gruppa da costums da Vaz.