Uestg Peter Bürcher 
viseta Turitg

(cp) Sil messadi d’uestg Peter Bürcher, administratur apostolic digl uestgiu da Cuera, ha il Cussegl sinodal dalla baselgia catolica turitgesa schau saver ch’ins envidassi bugen el a Turitg.

Oz gievgia, ils 4 da fenadur, vegn igl administratur apostolic, uestg Peter, a celebrar la sontga Messa ella «Liebfrauenkirche» sco avertura dalla radunonza sinodala. En la Casa Cumin a Turitg vegn uestg Peter a sedrizzar als sinodals. El ei engrazieivels per tonta bunaveglia da dialog.

Duront las empremas jamnas ha igl administratur apostolic, uestg Peter, giu numerus buns contacts cun catolics, aschia era a Turitg. Leu eis el s’entupaus culs commembers dils decanats, ha priu part d’ina sesida dalla cumissiun da finanzas digl uestgiu da Cuera e dalla Conferenza dils ordinariats dalla Svizra tudestga. En dudisch pleivs ha el cresmau, tschun gadas a Turitg e Glaruna.

La collaboraziun – e quei el rom dil Cussegl episcopal – cun uestg auxiliar Marian Eleganti ed il vicari general per Turitg e Glaruna, sur Josef Annen, ha possibilitau ad uestg Bürcher d’emprender d’enconuscher meglier la situaziun els cantuns Turitg e Glaruna. Era ha igl administratur apostolic retschiert plirs spirituals e collaboraturs ecclesiastics ord quels dus cantuns per sediscuorer.