Daventan noss uffants assassins da carriera?

La chauma da las dunnas è passada. Ella ha muventà insatge enten mai. Natiralmain ch’jau sun per l’egualitad tranter dunnas ed umens. Cumbain ch’jau ves anc potenzial da meglierament. Ma tge che ma disturba en connex cun questa discussiun è: Noss uffants vegnan betg pli resguardads sco regal, na, els vegnan degradads ad assassins da carriera. Per mai èsi anc adina in dals pli bels e pli impurtants pensums dad esser mamma ed educar. Canortas d’uffants pon surprender la tgira e la surveglianza, ma la gravidanza e la parturaziun èn lezias che mo ina dunna po surpigliar. Per mai èsi adina in privilegi d’esser mamma. Gea, jau ma resent adin’anavant ventiraivla d’esser mamma. Quai na signifitga dentant betg ch’jau hai gì da desister da mia carriera. Jau hai simplamain adattà mes pensum professiunal. Mia carriera n’era betg pli en il center. En il temp d’ozendi datti bleras pussaivladads da cumbinar la famiglia cun la professiun, grazia a canortas, a la lavur a temp parzial, al biro a chasa ed uschia anavant. Er ils umens èn ozendi per regla plitost pronts da sa participar da la tgira e la surveglianza dals uffants. Jau sustegn fitg sche dunnas returnan al mastergn suenter avair passentà in’interval da maternitad. Dentant mintga dunna duai decider sezza tge ch’è impurtant per ella e quant ch’ella vuless lavurar dasper l’engaschament per la famiglia. N’emblidain betg da punctuar: esser mamma è in’incumbensa a temp cumplain. Quai duai era vegnir respectà ed undrà. I na dastga betg esser ch’ina mamma che na lavura betg pli en il mastergn u s’engascha professiunalmain be a temp parzial vegnia disrespectada en ina maniera u l’autra. Mettain puspè en il center noss uffants, ils resguardain puspè sco regal e sajan conscients da nossa responsabladad. Martha Widmer-Spreiter, deputada dal

cussegl grond, candidata cussegl naziunal pbd