La Tessanda fa festa pels 60 ons in quista chasa

DA FLURIN ANDRY / ANR

L’on passà ha pudü festagiar la Tessanda in Val Müstair il giubileum da 90 ons. Ingon esa darcheu ün giubileum: Avant ses decennis han las tessunzas fat müdada e s’han stabilidas illa chasa ingio cha la Tessanda es amo hoz. «Daspö cha nossa tessanda ha survgni l’on passà per seis novantavel visita da cusglier federal Ignazio Cassis e chi’d es gnü rapportà da la Tessanda a Sta. Maria in gazetta, radio e televisiun vaina cuntinuà cun nossa lavur», disch Maya Repele chi presidiescha il cussagl da fundaziun da la Tessanda e maina la gestiun da quella. Parallelmaing han las 14 collavuraturas, per part in plazza parziala, e la giarsuna as dedichadas a la comunicaziun: «No vain dat pais da comunichar nossa sporta da maniera professiunala, contemporana, ma eir allegraivla», manzuna ella. Daspö december es la Tessanda preschainta i’ls mediums socials, facebook ed instagram, e publichescha là regularmaing infuormaziuns. Implü han las tessunzas davant chasa sper la via üna tabla sülla quala i scrivan minch’eivna üna comunicaziun chi ha da chefar culla Tessanda. «Quai es üna buna metoda per render attent a nossa sporta e chi nu cuosta neir uschè bler, no stuvain nempe amo adüna verer da na sguazar finanzas.»

Fat müdada e s’installadas 
in l’aigna chasa

«Eir quist on pudaina festagiar ün giubileum, e quai ils 60 ons daspö cha la Tessanda as rechatta in quista chasa», declera la manadra da gestiun Repele. Sco ch’ella cuntinuescha d’eira la Tessanda da chasa fin da l’on 1959 d’immez Sta. Maria illa chasa ingio chi’s rechatta hoz l’albierg da giuventüna. «Il lö d’eira qua però fich limità, uschè ferm cha’l cussagl da fundaziun da quel temp vaiva decis da cumprar e fabrichar oura üna chasa da paur, illa quala la Tessanda es amo uossa.» Quista cumprita ha custü 150 000 francs, quai chi sarà stat da quel temp ün fich grond import. «Grazcha a bleras donaziuns generusas d’eira gratià da ramassar quista somma, da maniera chi s’ha pudü far müdada.» Als 5 lügl 1959 han las tessunzas, ils cusgliers da fundaziun e la populaziun pudü festagiar l’inauguraziun da las nouvas localitats da la Tessanda.

Quist on darcheu alch 
per inaugurar

«Eir als 5 da lügl, dimena precis avant 60 ons, es tuot la populaziun da la Val ed eir d’utrò invidada da gnir pro no a far impringias», s’allegra la manadra da gestiun Repele, «no pudain inaugurar in venderdi nossa nouva località per demonstrar co chi vain tessü.» La glieud chi passa sper la Tessanda via po verer aint da la vaidrina co cha las tessunzas lavuran vi dals talèrs. Sch’inchün less entrar in chasa per verer daplü da la Tessanda cun seis passa 20 talèrs per part fich vegls exista eir quella pussibiltà.

Las infuormaziuns lasupra ed eir davart ils differents prodots chi naschan illa Tessanda a Sta. Maria as chatta sülla pagina d’internet

tessanda.ch.

L’inauguraziun dal local per demonstrar co chi vain tessü illa Tessanda a Sta. Maria es in venderdi, ils 5 lügl da las 15.00 a las 18.00.