Success colligiaus 
cun gronda sfida

Da Hans Huonder / anr

Ils juniors B dalla Surselva han contonschiu la gronda finamira, numnadamein la promoziun ella ligia da Coca Cola. D’atun spetgan fetg ferms adversaris sils juniors sursilvans. La squadra ch’ha gudignau il campiunadi dalla gruppa 1 da promoziun dils juniors B dall’Uniun da ballapei dalla Svizra orientala consista da giugadurs da differents clubs. Ils giugadurs derivan da Mustér e Vrin entochen Schluein e Laax. Igl ei in mussament dalla buna collaboraziun, mo era dalla finamira communabla dils clubs da ballapei: Ils megliers giugadurs d’ina vegliadetgna en in’equipa. Ils giugadurs ein loschs dil grond success contonschiu ed attribueschan quel a plirs facturs: Grondius spért d’equipa, harmonia, qualitad sin tuttas posiziuns e la voluntad da vuler gudignar mintga giug. Els ein denton era pertscharts dalla gronda sfida che spetga sin els igl atun vegnent. Da spiarder dat ei denton nuot, gia la participaziun a quella ligia porscha als giuvenils la pusseivladad da far novas ed impurtontas experientschas. Grazia ad ina tenuta fetg positiva ei l’equipa cul trenader Claudio Bundi alla testa marschada la primavera d’ina victoria a l’autra. In sulet da nov giugs ei vegnius spiars. Quei success, mo era la promoziun da Schluein Glion ella secunda ligia regiunala e da Trun/Rabius ella tiarza ligia muossa ch’il ballapei sursilvan ei il mument sin in 
bien nivel. Ins astga pia esser spanegiaus gia ussa sin la proxima stagiun.

Pagina 3