Success historic – bia plascher – nova motivaziun

Da Hans Huonder / anr

Ils juniors B dalla Surselva han gudignau il campiunadi da ballapei ella categoria dalla promoziun. La pagaglia persuenter ei la promoziun ella ligia da Coca Cola. Pils giugadurs pertuccai ei quei success reussius grazia al grond spért d’equipa, igl engaschament d’in e scadin e la grondiusa lavur dil stab da trenaders cun Claudio Bundi alla testa. Dils nov giugs ella gruppa cun Domat, Arbon, Rheineck, Wittenbach, Au-Berneck, Rotmonten, Bogn Ragaz, Appenzell e Mels ha l’equipa dalla Surselva gudignau siat, fatg in remis e spiars in sulet. Cun treis puncts avantatg sin Domat han ils juniors sursilvans la finfinala contonschiu igl emprem rang. La promoziun ella ligia da Coca Coca – vul dir il pass d’ina categoria dall’Uniun da ballapei dalla Svizra orientala en ina categoria dall’Uniun da ballapei svizra – ei in mument historic pil ballapei sursilvan. Aunc mai ha in’equipa da juniors dalla regiun saviu dar en ina ligia aschi aulta. «La grondiusa atmosfera, la veglia da far tut il pusseivel ed il plascher da dar ballapei – surtut offensiv e creativ – ein stai ils garants per quei success», di il trenader Claudio Bundi. Quei success seigi nundescrivibels, munti denton era da luvrar fetg bein egl avegnir per aschia aunc saver semigliurar. En vesta alla stagiun vegnenta di el: «Sin nus spetgan equipas fetg fermas. Ils clubs en quei campiunadi san encurir ora lur giugadurs ord in bia pli grond diember che nus. Nus selegrein denton fetg sil campiunadi igl atun e savein segiramein mo profitar dils giugs vegnents.»

«Nus levan gudignar»

Loschs dil success contonschiu ein buca mo ils responsabels pils trenaments e quels dils clubs dalla Surselva involvi ell’equipa, mobein era ils juniors sezs. «Nus havein cumbattiu in per l’auter entochen che mintga giug ei staus a fin. Enteifer il team havein nus giu ina fetg buna harmonia grazia a dus ferms golis, ina fetg buna defensiun ed excellents attaccaders», dian ils juniors Fabio Casanova da Vignogn e Kai Strimer da Ruschein. La pli gronda qualitad seigi segiramein quella dil vuler stada, cumpletescha Luca Stabile da Falera. Per Alex Miguels Neves Lopes da Glion ei era il saung freid dils attaccaders avon il gol dils adversaris stada ina dallas grondas qualitads. «La fidonza in en l’auter ei stada fetg gronda e nus havein saviu nua che mintgin hagi sias qualitads. Nus havein battiu sco frars in per l’auter», di Kelvin Shako da Mustér. Per Yves Wellinger da Falera ei la qualitad dall’entir’equipa in dils motivs principals dil success.

Engaschament da mintga singul

Ina grond’unitad dils meinis dat ei era tier la damonda tgeininas che seigien stadas las fermezias principalas dall’equipa. «Il focus da vuler gudignar, ina buna harmonia sil plaz e sper quel, perseveronza, tempo e motivaziun», dian Nico D’Atria da Glion, Mias Erni da Laax, Mattia Büchler da Schluein e Renato Ascenso dos Santos da Glion. Per Samuel Zinsli da Valendau ed Andri Noa Sgier da Schluein ha il grond engaschament da mintga singul motivau in l’auter e ch’ins ei seconcentraus da giug sin giug senza mirar grond sin la tabella. Per Sani Caduff da Glion ei era la buna cameradaria sper il plaz da ballapei in dils motivs dil success. «Mintgin fa tut il pusseivel e s’engascha entochen la davosa minuta», di Josa Capeder da Duin ed Andriu Alig da Vrin cumpletescha quei votum: «La finamira da gudignar ha signau nus.»

Loschs dil success

Ils giugadurs ein lu era loschs dil success contonschiu questa primavera. «Per mei munta quei success fetg bia. Jeu sun fetg loschs sin mes congiugadurs e naturalmein era sin nies trenader Claudio Bundi», di Fabio Casanova da Vignogn e Luca Stabile da Falera manegia: «Suenter duas stagiuns cun grond engaschament havein nus finalmein giu il success spitgau.» Mattia Büchler da Schluein puntuescha: «Nus astgein veramein esser loschs da quei che nus havein contonschiu.» Ed Alex Miguel Neves Lopes da Glion va aunc in pass pli lunsch: «Nus havein scret historia e contonschiu enzatgei che negin dalla Surselva ha contonschiu avon.» Sani Caduff da Glion e Daniel Martins Moreira da Falera ein perschuadi ch’il success ei pli che meritaus.

La proxima stagiun spetga

La promoziun fuss contonschida ed aschia la gronda finamira. D’atun ha ei denton num tener petg ad equipas pli fermas che quellas dalla primavera vargada. Plirs giugadurs vegnan buca pli ad esser dalla partida damai ch’els han survargau la vegliadetgna. «Cuntinuar sco entochen dacheu e trenar aunc dapli. Ei fuss falliu d’esser cuntents ussa cun quei success cheu», di Mattia Büchler da Schluein. Per Marlo Cavegn da Laax eis ei clar: «Jeu less migliurar la cundiziun ed il sentiment per la balla.» Nico D’Atria da Glion selegra sil campiunadi vegnent: «Jeu spetgel da tuts giugadurs engaschament cumplein era quest atun. Mo lu savein nus cumprovar nies success.» Kai Strimer ei perschuadius che l’equipa sursilvana po tener petg alla concurrenza e Marlo Cavegn di: «Jeu sperel che nus sappien mussar nossas fermezias ed aschia nezegiar nies potenzial. Sch’ins vul propi san ins contonscher fetg bia sco equipa.» Josa Capeder da Duin manegia: «Nus stuein empruar da dar nies ballapei e lu vegn quei bien. Ils giugs vegnan ad esser ina gronda sfida per nus.» Yves Wellinger da Falera ed Andriu Alig da Vrin che dattan d’atun culs juniors A manegian: «Nus sperein ch’ils novs s’integreschien bein ell’equipa e lu dat quei ina buna stagiun.»

Giugadurs dall’entira Surselva

Alla squadra han apparteniu: Fabio Casanova (Lumnezia, goli), Mattia Büchler (Schluein Glion, goli), Renato Ascenso dos Santos (Schluein Glion, defensiun), Fadri Muoth (Danis-Tavanasa, defensiun), Sani Caduff (Schluein Glion, defensiun), Kai Strimer (Schluein Glion, defensiun), Yves Wellinger (Schluein Glion, defensiun), Daniel Martins (Schluein Glion, amiez), Alessio Schmed (Trun/Rabius, amiez, capitani), Nico D’Atria (Schluein Glion, amiez), Andriu Alig (Lumnezia, amiez), Josa Capeder (Schluein Glion, amiez), Alex Miguel Neves Lopes (Schluein Glion, amiez), Sattar Afzali (Schluein Glion, amiez), Marlo Cavegn (Laax, amiez), Luca Stabile (Schluein Glion, amiez), Mias Erni (Laax, amiez), Andri Noa Sgier (Schluein Glion, amiez), Kelvin Shako (Schluein Glion, attaccader) e Samuel Zinsli (Schluein Glion, attaccader). L’equipa ei vegnida trenada da Claudio Bundi e dil trenader da golis Damian Arpagaus.

1. Surselva 9 7 1 1 50:17 22

2. Domat 9 6 1 2 29:20 19

3. Arbon 9 5 1 3 25:23 16

4. Rheineck 9 5 0 4 36:27 15

5. Wittenbach 9 4 1 4 24:21 13

6. Au-Berneck 9 4 1 4 18:27 13

7. Rotmonten 9 3 2 4 17:24 11

8. Bogn Ragaz 9 3 1 5 29:29 10

9. Appenzell 9 3 0 6 23:34 9

10. Mels 9 1 0 8 11:40 3