In milliun francs gudogn per la vischnaunca

(anr/hh) Vischinas e vischins da Val S. Pieder han approbau il quen communal 2018 il venderdis sera. Cun in surpli d’entradas da varga in milliun francs, respectivamein 700 000 francs meglier che budgetau, ei il quen fetg positivs. Sco quei che las autoritads communalas communicheschan ei quei quen favoreivel d’attribuir en emprema lingia ad in surpli d’entradas da taglia. La vischnaunca da Val S. Pieder ha fatg igl onn vargau investiziuns da 3,4 milliuns francs brutto, respectivamein dad 1,1 milliuns francs netto.

La radunonza communala ha sbursau in credit da 300 000 francs per il baghetg niev dall’Associaziun dalla sennaria Val S. Pieder. L’associaziun preveda d’investir rodund 3,5 milliuns francs el baghetg niev. Per la construcziun d’in reservuar d’aua han vischinas e vischins concediu in credit supplementar da 700 000 francs. La finfinala ha la radunonza communala dau triev alla damonda d’ina Svizra da daventar burgheisa.