Varietad ch’oblighescha

Da Hans Huonder / anr

Retschercas dils davos onns muossan che la varietad da specias ei bia pli gronda en regiuns aultas che supponiu. In exempel ei l’Alp Flix en Surses. Leu ein 3500 specias sur il cunfin digl uaul vegnidas cumprovadas, quei ch’ei varga siat pertschien da tuttas specias dalla Svizra e quei sin sulettamein tschun kilometers quadrat. Las cundiziuns en regiuns pli aultas sedifferenzieschan claramein da quellas el funs dallas vals. Quei ei da constatar il meglier la primavera cura ch’ils praus vegnan verds giufuns e la cozza da neiv ei aunc serrada en territoris sur igl uaul. En regiuns alpinas ein ils unviarns liungs, las stads cuortas e l’aura semida pli savens ed ei magari incalculabla. Malgrad quellas cundiziuns vivan mellis creatiras sin quellas altezias. Tgei specias ei quei e tgei cundiziuns garanteschan ad ellas in surviver en quellas regiuns? Da quellas, mo era d’autras damondas ei il biolog e pedagog da museum Flurin Camenisch sefatschentaus la sonda suentermiezdi en siu referat ell’Academia Vivian a Stagias en Val Medel. En sia presentaziun cul tetel «alpinists e dormulents – animals e plontas ellas muntognas» ha el explicau differents detagls che fan il mund alpin fetg interessants per mintga viandont. Mo buca mo la varietad dallas specias ei gronda ellas muntognas, mobein era la responsabladad internaziunala dalla Svizra da mantener quella.

PaginA 3