Veirs sclavs dalla digitalisaziun

DA GION NUTEGN STGIER / ANR

Per interpretar la solitaritad da nossa carstgangadad angal cun solt e musica dovrigl en coreograf scu Eno Peci e saltunzas e saltunzs digl Ballet statal da Vienna. La scenas preschentadas testifitgeschan tgi igl uman è sez responsabel per chel abandung e tg’el dovra perveira chell’isolaziun. Oz vivagn nous ainten en mond surnatural, cun blera hectica e cun pac contact tar igl concarstgang. È chegl igl cass, alloura è mintgign ranviia alla digitalisaziun, dalla quala nous ischans ple tgi angal dependents, schi betg gist sclavs. Ins dastga prest deir tgi ozande èn igls meds socials igl pang da mintgade, cun la consequenza tgi l’isolaziun è igl pi fidevel partenari da mintgign. Chel mond plagn solitaritad cun tot las sias fatschas ò Eno Peci, igl coreograf da renom, mess an maletg cun solt e cun musica. Uscheia ò igl public dalla premiera digl ballet «Zeitraum» vasia cun igls agens îgls la realitad digl abandung tgi vagn oz propi er tar nous.

Mimica expressiva

Cuntrari ad oters ballets tgi Peci ò creo pigl Origen Festival Cultural renunztga el tar igl ballet «Zeitraum» a scenas pitost romanticas, plagn armuneia e da blera calour. Igl dretg cuntign survign igl ballet antras igl solt prest static, graztga agls muvimaints da ferm caracter ed alla mimica tgi savess betg esser pi expressiva. Allas saltunzas ed agls saltunzs è reuschia durant l’antiera producziun da solt d’interpretar l’indolenza dall’umanitad, l’independenza tgi mintgign tschertga e cunzont er tgi la carstgangadad s’isolescha oz adegna daple.

Vistgias unifitgias

Tgi mintgign s’occupescha oz angal ple cugl mond digital, cun igls meds socials, cun la communicaziun electroncia mossa Peci er cun esser saltunzas e saltunzs vistgias unifitgias. Per tgi mintgign seia gio solitar e peglia betg cunaschientscha digl antier univers portan igls protagonists e las protagonistas durant igl ballet uregliers. Renunztga egn a chels para el prest da sa desperar, schi ester è per el tot chegl tgi corra e passa aint igl sies conturn ed ambiaint.

Isolo e pi ventirevel

Tgi nossa societad moderna observa strousch tge tgi igl concarstgang fò inscenescha Peci adegna puspe aint igl ballet «Zeitraum». Er las fadeias da manar egn sen ena miglra veia tgi la veia digitala fò adegna puspe naufragi. Fatg surstar ò tuttegna tgi Peci sottametta las scenas cun musica pitost leva, fegna e perfign desolanta. Gist uscheia desolanta scu la speranza digl carstgang da neir a freida cun la digitalisaziun tg’è oz en vezi. Ultra da chegl ò igl coreograf er tscharnia per chella producziun da solt ramours malruassevlas e malampernevlas. Cugl ballet «Zeitraum» porta igl coreograf alla gleisch tgi igl carstgang è pi ventirvel sch’el è isolo, er sch’el è bagn pertschert tgi da veiver ainten uschei’en mond è ena pagna. Alla fegn digl ballet è igl public sto pitost modest cugl applaus, er cun aveir da sa revigneir digl vasia sen tribuna. Vasia ò el solt tgi mareta igl predicat excellent ed ena preschentaziun alla quala tots on do la nota maximala.