Egn gudogn net malgro ampo ple pocs viagiaturs
DA GIERI BATTAGLIA
Igls acziunaris ad igls giasts da la sozietad da la pendiculara Razén-Veulden SA s’antupan mintg’on igl davos vendergis suaintermiezgi digl zarcladur par salvar lur radunànza generala. Renato G. Murk â ear uon puspe dastgieu banavantar egna pulita raspada d’acziunaris interessos an la remisa da l’ustreia Crap Salvatg a Veulden. Igl on passo â la pendiculara da Razén-Veulden (PRV/LRF) betga cuntanschieu digl tutafatg igl diember da passaschiers digls 2017. La raschùn par quella tschassada e stada surtut la mancànza da nev durànt igl unviern 2017–18. Igl vial da scursalar giu Domat eara lura saro tut unviern, ad ascheia â la PRV mancanto var 4000 passaschiers suletameing igl schaner digls 2018. Igl retgav digl manaschi e tutegna carschieu par 12% anviers igl on avànt. Parquegl ca la partizipaziùn agls abunamaints generals ad abunamaints da measa taxa â samussada sco positiva. Graztga ad egn bùn manaschamaint digls custs e saresulto egn gudogn net da 21 500 fràncs.
La revisiùn grànda da la parmavera 2018
Mintga 12 ons e’gl da far egna revisiùn grànda parveia da raschùns da sirtad. Part da quella fa la revisiùn da las cabegnas, l’inspecziùn da la sùa ad igl spustamaint da la sùa purtànta par 12 meters. Igl e vagnieu duvro prest 127 000 fràncs par far quellas lavurs da mantegnamaint nezessarias.
Purschidas pigls divers interess
S’antali ca la pendiculara Razén-Veulden less augmantar tànt igl diember da passaschiers sco ear las antradas da manaschi. Par cuntànscher quellas fegnamiras dat igl propostas definidas sco p. ex. purschidas pigls ziclists da velos da muntogna ne las tres spassageadas a las stélas alvas c’ân liac igls 14, 21 a 28 da fanadur. Plenavànt porscha la squadra motivada cugl magnafatschenta Roman Bernard a la testa egn survetsch fido a curtaschevel, igl qual cuntribuescha essenzialmeing a la cuntantientscha da la cliantela.
Igls abunamaints en impurtànts!
La rancunaschientscha digl abunamaint da measa taxa, digl abunamaint general a digl abunamaint general grischùn sco ear igl urari da tact da mintga meas’ura en savund igl cunzegl d’administraziùn elemaints impurtànts per restar venavànt atractivs par la cliantela. Gest agls possessurs digl abunamaint general a digl abunamaint general grischùn, ca darivan da la valada digl Ragn, vean igl purschieu caschùns idealas da far vieadis spontans a Veulden. La cunlavur cun la sutgera da Veulden a la Mutta safa ear da maniera positiva a funcziùna sainza dificultads.
La pendiculara davainta «verda»
Igl tetg cun andrezs solars ad egn tancadi electric en vagnieus mess an funcziùn a la staziùn a val da Razén. Custs ad antradas tegnan la pesapaja, ad igl andrez porta sasez gea suainter easser sto an funcziùn me egn on.
Suainter aver fatg 340 000 km â’l igl bus vigl stuieu vagnir ramplazo. Suainter diferaintas discussiùns, sclarimaints ad ofertas ân ign sadezidieu par egn bus an diever da dus ons annà. Quel vean ear duvro sco bus da ramplazamaint an cass da revisiùns a d’unviern sco bus pendular da Veulden a la staziùn da la sutgera a Raschuns.
Igl cunzegl d’administraziùn discargieu
Igls acziunaris ân prieu par bien tutas propostas sutamessas digl cunzegl d’administraziùn a caschùn da la radunànza generala da la sozietad da la pendiculara da Razén-Veulden, angraztgànd agl cunzegl administrativ par la sia lavur prudainta. Quel sacumpona da Renato G. Murk (parsura), Roman Bernard (vize-parsura a magnafatschenta da la PRV), Johann L. Camenisch, Magnus Camenisch, Jürg Frei ad Ignaz Cadosch.
La radunànza generala e vagnida concludida cun aplaus fervaint par la bùna lavur digl cunzegl d’administraziùn, digl revisurat a digl persunal. La 63avla radunànza generala da la PRV e vagnida concludida cun egn amparnevel aperitiv ad interessànts discurs an ravugls ple pintgs. La 94avla radunànza generala varà liac igls 26 da zarcladur 2020.
Gust da leger dapli?