Feasta digl Parc Natiral Bavregn se Nurdagn

(cp) Mintga dus ons festivescha igl Parc Natiral Bavregn da cuminànza cugls seas cumembers, la populaziùn ad igls vaschinadis cumembers la sia feasta digl parc. Igl tema d’uon e «Mund alpin». Parquegl anvidan igl PNB a la Corporaziùn Muntogna da Schons la populaziùn ad egna feasta cuminevla sen l’Alp Nurdagn. La feasta digl Parc Natiral Bavregn â liac uon la dumeingia digls 14 da fanadur sen l’Alp Nurdagn noua c’igl dat da giuder egn program varius. La feasta digl Parc antscheva a las diesch cun egn survetsch divin d’alp. Igl priedi da sear Ernst Oberli vean acumpagnieu da la musica populara «Alpin-Örgeler» da Tschuppegna. L’ustreia da feasta vean procurada antras la squadra da la Calandaria.

Concurenza amitgevla 
trànter igls vaschinadis

Sut igl moto «Mund alpin» samasiran las squadras da las vischnàncas digl Parc an disziplegnas divertevlas, cumbatànd pigl bucal ambulànt igl «Bavregnet». Agl curs da quella concurenza vignan «fusiunos» vaschinadis savund igl prinzipi da la casualitad. Puncts suplementars dat igl uon sen me egn meter quadrat: Tut las visitadras ad igls visitaders pon far part da la concurenza da determinar plàntas sen quella masira rastranschida. Igls puncts cuntanschieus van a favur da lur vaschinadis an concurenza.

Co rivar sen l’Alp Nurdagn?

Davent da Vargistagn/Lavanos cursescha tugi egn bus pendular suplementarmeing agl Bus alpin. Lur curs en coordinos cugl urari digl trafi public. Els curseschan antoca segl parcadi da la Tguma. Davent da là e’gl egna spassageada da var egna meas’ura sen egna veia planiva par rivar sen l’Alp Nurdagn. Trànteraint cursescha la carotscha pedulara da Fabienne Dolf trànter la Tguma a l’Alp Nurdagn. Tgi ca riva cugl auto privat po parcar lez a Lavanos near sen la Tguma. A tgi ca less cumbinar la feasta digl parc cun egn tur e’gl racumando da reservar posts agl bus da viandar Sur–Lai da Vons. Lez parta a las 10.05 davent da la farmada da la posta a Sur/Valragn (079 242 13 90). Davent digl Lai da Vons riv’ign an var tres uras sen l’Alp Nurdagn.

Igl avàntmiezgi digls 14 da fanadur statan ear a disposiziùn velos electrics ca pon vagnir prieus a tschains a Vargistagn pigl prezi da 20 fràncs. Ear ascheia po igl vieadi ad alp ad anavos vagnir fatg da maniera sportiva. Interessadas ad interessos en suplitgieus da s’anunztgear tigl colavuratur digl PNB Fabio Maurizio: fabio.maurizio@naturpark-beverin.ch near par telefon 081 650 70 11.

Da mal’ora a Maton

Da mal’ora â la feasta liac a Maton, segl parcadi sper l’ustreia Muntsulaj. Igl numer da telefon 1600 infurmescha davent da vendergis, igls 12 da fanadur noua ca la feasta digl Parc â liac.

Pigls unfànts dat igl egn program spezial: Davent da las 11.00 antoca las 16.00 vignan quels antruvidos da mular crap scalegl, i pon strischear a carsinar asens near tarlar istorgias or digl cudesch «Egna stad cun Ana & Rosa».

Excursiùn an las palés d’Anarosa

Acumpagnieu da spezialists vean igl piert excursiùns curtas da var ¾ d’ura par scuvrir la cuntrada da palés d’Anarosa c’e da muntada naziunala. Quegl e egna da las palés alpinas situada igl ple òlt an Svizra. Quellas palés poc profundas vignan pasculadas da maniera extensiva, ad ascheia â’gl pudieu safurmar egn spazi vital par plàntas raras sen que taragn bletsch.

Plenavànt po vagnir visito trànter las 12.00 a las 14.00 igl manaschi digl agroturissem da l’Alp Nurdagn c’e vagnieu aviert igl on passo.