Marisa Feuerstein (52), architecta, Scuol

Che importanza ha il rumantsch per Vus?

Il rumantsch es mia lingua materna, pero eir amo bler daplü. Rumantsch es cultura, sentimaint da vita, expressiun, dachasa, nossa tradiziun e nos möd da viver. Tras il rumantsch eschna orientats plütöst vers il süd, vers l’Italianità e quai correspuonda a nos caracter avert e plain da vita. Rumantsch es eir la clav per tuot las linguas latinas chi sun cun quai plü bain chapiblas. In rumantsch m’insömgia e fetsch quints. Quai nu va in tudais-ch, adonta cha quai es mia seguonda lingua materna. Bilinguità es ün regal.

Co promovais Vus il rumantsch?

Eu discuor consequaintamaing rumantsch a chasa, in büro o sül manster. Eu fetsch uschè suvent sco pussibel la correspondenza in rumantsch, quai impustüt cun las instanzas cumünalas. Sezzüdas cun cliantella o mansteranza indigena vegnan fattas in rumantsch. Dadour l’Engiadina suna superbgia da pudair dir cha rumantsch saja mia lingua materna e chi detta propi amo «ils Rumantschs».

Che avegnir ha il rumantsch?

Il rumantsch ha sgüra ün avegnir sch’el vain discurrü e promovü in famiglia ed in scoula. Eu am giavüsch dals Rumantschs però daplü avertezza ed incletta per ils oters idioms. Schi’s dà fadia as inclegia sainz’oter l’ün a l’oter.

www.100onns.ch