Sogn Placi

Da Giusep Capaul / ANR

S. Placi e s. Sigisbert – il di commemorativ dils fundaturs dalla claustra da Mustér – croda calendaricamein adina sils 11 da fenadur. Pli baul vegneva la festivitad era celebrada solemnamein gest quei di. Ei setracta tier s. Placi bein dalla pli gronda manifestaziun religiusa en Surselva. Dapi onns vegn ella anticipada sin la dumengia avon. Cul di da fiasta va mintgamai era igl onn dalla scola claustrala a fin. Dumengia vargada eisi pia stau s. Placi. Era sch’igl ei en emprema lingia la fiasta dalla claustra ha ella buca saviu vegnir celebrada uonn ella vasta baselgia claustrala. Quella ei dapresent en restauraziun. Las lavurs s’avonzan stupent, aschia che l’inauguraziun cun la consecraziun d’in niev altar ha liug uonn da s. Martin, patrun dalla baselgia claustrala, ils 11 da november. La fiasta da s. Placi ei era sesplegada uonn el rom tradiziunal. Celebrant principal dalla messa pontificala ei igl avat da Nossadunnaun, msgr. Urban Federer, staus. Siu motto: Nus festivein la cardientscha. Ina messa da Joseph Haydn – interpretada dil chor claustral, orchester, organist, solistas e solists – ei stada ton edificonta sco elevonta. La processiun ei ida naven dalla baselgia da S. Gions sin claustra. Avon la porta claustrala ha avat Urban dau la benedicziun. Concludiu ei vegniu cun las usitadas salvias a dignitaris e magistrats. Igl ei stau in s. Placi cun bia glieud, in solemn survetsch divin e bellezia processiun. Quei tut s’enretscha en ina liunga cadeina da festivitads pils fundaturs dalla claustra.

pagina 3