Casa Carigiet a Trun

Ils 19 da fevrer ei il tetg dalla Casa Carigiet che sesanfla ella proxima vischinonza dalla baselgia parochiala da Trun daventaus l’unfrenda d’in incendi. Ina casa ch’ei probabel schurmegiada dalla Protecziun da monuments che sto vegnir risguardada tier ina sanaziun. Oz – suenter prest tschun meins – ei il tetg aunc adina scuvretgs, aschia che la plievgia penetrescha egl entir edifeci. Las tievlas d’eternit ch’ein siglientadas en consequenza dil barschament schaian aunc adina tschadilà el contuorn. Damai che quellas restonzas ein in prighel per ils cussadents e vischins ston quellas vegnir decontaminadas e dismessas immediatamein. Il tetg dalla tuor el nord che sesanfla gest visavi la via principala ei aunc adina scuvretgs. Sch’ins ha priu cheu las mesiras da segirtad necessarias sai jeu buca giudicar. Damai che la casa ei buca munida cun puntanadas ei quei probabel denton strusch il cass.

Alla vischnaunca ch’ei apparentamein en contractivas culs possessurs eis ei buca reussiu da secunvegnir damai ch’ina partida vul contonscher in gudgogn maximal, probabel sur la segirada, e blochescha aschia ina soluziun raschuneivla.

Jeu supplicheschel ils responsabels d’examinar las pusseivladads dadas per intervegnir ed aschia impedir che quei baghetg historic mondi en decadenza totala.

Pius Lombriser, burgheis da Trun

e sesents a Büsserach