Quater presentaziuns a Mustér

(anr/hh) La Compagnie Nicole e Martin festivescha il giubileum da 20 onns, denter auter cun quater presentaziuns l’jamna vegnenta a Mustér. Dapi dus decennis ein Nicole e Martin sin viadi cun lur tend’alva e fascineschan il publicum.

Lur art dil teater cumbinescha il raquent da praulas cun moviments e scenas acrobaticas sco era cun buna musica. Aspectaturs giuvens e vegls van aschia sin in viadi poetic e nunemblideivel.

Ils davos 20 onns ha la formaziun dau 2750 presentaziuns en 550 loghens e 14 tiaras. Quei en buca meins che otg lungatgs.

Ensemble independent

Nicole e Martin ei in ensemble da teater independent. El ei vegnius fundaus dils dus acturs svizzers Nicole Gubler Schranz da Genevra e Martin Gubler da Liestal. Els produceschan, insceneschan, creeschan e presentan lur agens tocs. Els han scaffiu aschidadir ina nova fuorma dil teater popular: Teater sco aventura, mo era sco liug da sentupada da carstgauns, independentamein da lur vegliadetgna, lur derivonza sociala e lur situaziun da veta. Il fundament per lur producziuns da teater ein las praulas ord la retscha d’ovras dils frars Grimm. Per lur engaschament han els retschiert igl onn 2002 il Premi da cultura dil cantun Basilea-Tiara, igl onn 2006 dus premis al festival ad Edingburgh en Scozia e 2014 igl emprem Premi da praulas dalla Svizra. Quest onn ei igl ensemble nominaus per il Premi d’art pign dalla Svizra. Da gievgia, ils 18 da fenadur entochen dumengia, ils 21 da fenadur 2019 ein Nicole e Martin da veser a Mustér. Els sepresentan spel Center Aua Viva a Raveras.

Termins da presentaziun a Mustér: Gievgia, ils 18 da fenadur 2019 allas 17.00 (Hänsel e Gretel); venderdis, ils 19 da fenadur 2019 allas 17.00 (Ils Musicants dil marcau da Bremen); sonda, ils 20 da fenadur 2019 allas 17.00 (Il Hans da fier) e dumengia, ils 21 da fenadur 2019 allas 11.30 (La mattatscha senza mauns). Ulteriuras informaziuns www.nicole-et-martin.ch