100 onns 
Vita Surselva

(anr/abc) Ils 26 d’october 1919 han ins fundau a Rueun la «Kreiskrankenkasse Ruis». El decuors dils decennis ha quella fusiunau treis gadas. Oz eis ei la Vita Surselva. Igl emprem onn da gestiun 1920 han ils segirai pagau ella media la summa da 14 francs e 02 raps ad onn. Uonn eis ei 99 onns dapi ch’ins ha stuiu prender la mesira rigurusa ed alzar la premia massivamein. In pass impurtont ella historia dalla Vita Surselva ei schabegiaus 1991. Lu ha la radunonza da delegai dalla CMP Gruob/Foppa decidiu da fusiunar culla CMP Rueun. In temps malsegir ha la Vita Surselva giu da dumignar il 2005. La cassa grischuna CMP Grischun haveva fatg allas vischnauncas in’offerta per cumprar la CMP Surselva. Quell’ei sedustada cun success. Il marcau da Glion, las vischnauncas da Sursaissa e Rueun han priu decisiuns encunter ina vendita. Ins ha buca seschau tschorventar dallas summas offeridas. Glion havess retschiert bunamein 700 000 francs ord la vendita, Rueun 120 000 francs. L’interpresa festivescha siu centenari ils 9 d’uost 2019 cun in act commemorativ e puschegn ella sala dalla pleiv evangelica a Glion.

pagina 3