Ardez, Riom u Segl?

(rtr) Ils 12 finalists èn enconuschents. Tranter quels sa chattan er quatter vitgs grischuns: Ardez, Riom, Segl e Landarenca. Fin ils 15 d’avust po il public decider tge vitg che vegn onurà cun il premi «Pli bel vitg da la Svizra 2019».

Quest onn tscherna la populaziun gia per l’otgavla giada il pli bel vitg da la Svizra. Ord las propostas che lecturas e lecturs da la «Schweizer Illustrierte», «L’illustré» ed «il Caffè» han fatg ha ina giuria nominà 50 vitgs per la concurrenza. Il public è entant sa decis per ils suandants 12 finalists: Igl è mintgamai trais vitgs da mintga regiun linguistica.

Durant il fanadur visitan ils quatter ambassadurs lur regiun e rapportan da quella. La musicista Bibi Vaplan represchenta la Svizra rumantscha, Sebalter la Svizra taliana, Marc Trauffer la Svizra tudestga e Fanny Smith la Svizra franzosa. Las proximas emnas cumparan en las gasettas «Schweizer Illustrierte», «L’illustré» ed «il Caffè» purtrets dals vitgs. Ils 23 d’avust vegni enconuschent tgenin ch’è il «Pli bel vitg da la Svizra 2019».

Ils 12 finalists da l’occurrenza naziunala èn:

Ardez (GR), Riom (GR), Segl (GR), Gandria (TI), Landarenca (GR), Meride (TI), Albinen (VS), Trub (BE), Vitznau (LU), Chandolin (VS), Epesses (VD), Gruyères (FR).