126, in niev record

dad augustin beeli / anr

Ier ha il cuors romontsch sursilvan intensiv 2019 entschiet. Il menader Conradin Klaiss ha saviu beneventar 77 dunnas, 41 umens ed otg affons all’occurrenza che cuoza duas jamnas. 13 scolastas e scolasts instrueschan lecziuns sin 12 livels. Las localitads ella Casa Sentupada dalla claustra da Glion porschan il dretg ambient per in diember carschent da participonts. Divers facturs ein tenor il menader decisivs pil success da quella purschida. Sco quei che Conradin Klaiss puntuescha ei il success d’attribuir a Francestg Friberg ch’ei s’engaschaus duront 30 onns per quella purschida. Ell’ei daferton instituziunalisada. Biaras participontas e biars participonts tuornan onn per onn al cuors culla finamira da seperfecziunar el lungatg romontsch. El center digl emprender in lungatg stetti adina la relaziun persunala, declara Klaiss ell’intervista cun l’anr. Ils participonts ein ella vegliadetgna denter otg ed 80 onns. Ier suentermiezgi, a caschun dall’avertura dil cuors, ha il meinagestiun da Surselva Turissem, Kevin Brunold, referiu e presentau il romontsch sco scazi d’ina regiun multifara. La convivenza dallas culturas vitaliseschi e rendi ina regiun pli interessanta che «monolingualas». Il meinagestiun da Surselva Turissem ha accentuau quei cun presentar sia squadra da 18 collaboraturas e collaboraturs. La gronda part tschontscha romontsch ni ei aviarta pil romontsch ch’ei questa e la proxima jamna el center. Ina squadra da 13 scolastas e scolasts ei responsabla per las lecziuns.

pagina 3