«BunaNotg» – da nov en l’entir Grischun

da Martin cabalzar

Sur la plattafurma cun il num rumantsch «BunaNotg» pon da nov er ils giasts da Tavau, Mustér, Sedrun, Savognin, Beiva, Albula sco er en Engiadina Auta e Bassa segirar lur pernottaziuns d’hotel. Tras questa extensiun sin l’entir chantun obtegn la plattafurma da Grischun Vacanzas, sin la quala il giast po sez definir il pretsch da sia pernottaziun, adina dapli attractivitad ed impurtanza. A partir da quest mais fan 138 hotels en 23 lieus or da tut las regiuns grischunas part da la nova plattafurma turistica «BunaNotg». Uschia ha la plattafurma da Grischun Vacanzas ch’è vegnida lantschada al cumenzament da quest onn gia cuntanschì ina derasaziun sur l’entir chantun. Ils giasts pon uss tschentar dumondas da pernottar en tut las regiuns grischunas, davent da l’Engiadina sur il Grischun central fin en Surselva, en il Scanvetg fin en il circul da Tavau, e quai per il pretsch ch’els imaginan.

Il giast decida il pretsch

Sin la plattafurma www.bunanotg.ch inditgescha il giast il lieu tschernì per sia pernottaziun, elegia la categoria da stailas e l’alimentaziun e definescha era gist sez il pretsch. Sin fundament da questa dumonda san ils hoteliers interessads reservar il giast e quai senza stuair pajar ina taxa da cumissiun. Na datti nagin resultat scroda la dumonda da mesanotg ed il giast vegn infurmà per sms che la reservaziun na saja betg registrada.

BunaNotg in gudogn per tuts

Martin Vincenz, il schef operativ da Grischun Vacanzas, è satisfatg che la plattafurma da «BunaNotg» ha chattà grond’accoglientscha. «Cun in’extensiun sin l’entir chantun Grischun avain nus cuntanschì in’impurtanta finamira, uschia Vincenz. Natiralmain sajan ulteriurs hotels che tschertgan d’occupar supplementarmain lur stanzas cun giasts da «BunaNotg» bainvegnids sin la nova plattafurma. «‘BunaNotg’ è in gudogn tant per ils hoteliers sco per ils giasts», declara el. Il giast possia condecider essenzialmain davart la purschida ed il hotelier possia da sia vart occupar ils letgs disponibels gist er en la sessiun secundara a curta vista.

Lantschada è la purschida vegnida al cumenzament da l’onn cun in manaschi da gastronomia a Cuira e conturn, da 100 dumondas da giasts han ins realisà entaifer curt temp 40 novas pernottaziuns mo en la regiuns da Cuira. Cun 138 hotels e pensiuns èn actualmain radund 20 pertschient da las pernottaziuns colliadas cun la plattafurma da «BunaNotg».

Las incumbensas 
da Grischun Vacanzas

L’incumbensa da Grischun Vacanzas che sa basa sin ina cunvegna da prestaziun cun il chantun Grischun è da gudagnar novs giasts per la regiun turistica dal Grischun e da procurar ch’ils giasts existents turnian adina puspè en il Grischun. Grischun Vacanzas ha cunzunt l’incumbensa d’examinar ed analisar ils svilups en il sectur da la digitalisaziun ed il cumportament da las gruppas d’interess e da lur preferenzas en centers da cumpetenza spezialisads ch’èn abels da dar impuls per il niz turisitc. Grischun Vacanzas ha era l’incumbensa da tschertgar e sviluppar a moda activa ideas innovativas per il turissem grischun, da valitar quellas speditiv ed a moda sistematica, procurond per las decisiuns necessarias per la transfurmaziun pratica. L’organisaziun turistica chantunala vul plinavant era metter a disposiziun manaders da project cun experienza che sviluppeschan ensemen cun las destinaziuns interessadas projects innovativs cun in potenzial surregiunal. Da cuminanza vul ins era sviluppar novs products da propagar quels sin la fiera naziunala ed internaziunala.

Grischun Vacanzas ha plinavant era l’incumbensa da metter a disposiziun ina purschida da servetschs che pussibilitescha che las organisaziuns da destinaziun ed ils acturs turistics possian profitar a moda simpla, directa e senza grondas stentas da las novas tecnologias. Entras colliar differents servetschs digitals per ils partenaris daventan quels pli favuraivels.

Per realisar questas finamiras sustegn il chantun Grischun Vacanzas sin fundament da la cunvegna da prestaziun cun ina contribuziun chantunala das annualmain sis milliuns francs.