«Cantar fa mei ventireivla»

Da Giusep Venzin / ANR

«Sch’ins sa buca dir cun plaids, lu san ins dir cun cant e musica.» Cant e musica ei per Angela Carina Blumenthal in elixier. «Cantar munta libertad. Jeu contel e sun ventireivla.» La giuvna da 26 onns pitescha dapi la naschientscha da hemiplegia, dalla schirada d’ina gruppa da musclas. Plein energia puntuescha ella: «Jeu sesentel buc impedida.» El musical conta Angela Carina Blumenthal e gioga ina pintga rolla. Suenter las empremas emprovas eis ella ventireivla: «Jeu vegnel acceptada e quei fa a mi in plascher enorm.»

«Just the way 
you are»

Ella veta dad Angela Carina ha la musica ina rolla impurtonta. Il pli bugen teidli ella «pop» e dil musical plai ad ella il meglier la canzun «Just the way you are» da Bruno Mars. El musical «En 80 dis entuorn il mund», presentaus quest atun a Vella, conta Lionel Blumenthal la canzun. El ei il frar dad Angela Carina ed era empau siu protegider. «El sustegn mei ed jeu selegrel da siu success.»

Bugen teidla la Lumneziana las balladas da Mattiu. «Ellas tuccan il cor.» Cun Giganto ha Angela Carina fatg igl emprendissadi mercantil ed aschia enconuscha ella Ivo persunalmein e teidla bugen ses tuns.

«El carmala da far in pass anavon»

Suenter las empremas emprovas pil musical «En 80 dis entuorn il mund» ei Angela Carina incantada dils mussaders. «Roland Körner carmala da far in pass anavon. El dat a nus curascha da crer enten sesez.» El cant instruescha Claudio Bezzola ils participonts dil musical ed Angela Carina constatescha: «Ins vesa ch’el ei in pedagog. El vesa il carstgaun e lu il cantadur.» Angela Carina lavura a Glion sin canzlia e habitescha a Vella. «In agen percasa ei per mei impurtont.» Dil niev musical da Musical Surselva spetga ella: «Che la glieud hagi plascher da nossa producziun. Per mia veta spetgel jeu bia bunas impressiuns e regurdientschas.»