Collegi da Saint-Maurice

(cp) Muort munconza da scolars, daners e plaz vegn igl internat dall’abbazia da Saint-Maurice (Valleis giudem) serraus alla fin digl onn da scola 2019/2020. La scola media resta denton. Igl internat dall’abbazia da St. Maurice exista dapi 1806. El ei vegnius aviarts a siu temps sin giavisch dil cussegl grond dil Valleis – il medem mument sco era la scola. La tradiziun pedagogica da quei liug exista dapi liung temps. Ella va anavos tochen sin la fundaziun dalla claustra 515, pia avon varga 1500 onns e che vala sco il pli vegl monasteri digl Occident ch’exista senza interrupziun. Egl internat ein duront dus tschentaners mellis e mellis students stai. 1907 era ei 238 egl internat, avon 30 onns aunc adina 180 ed oz mo pli 10 scolars.

Per la serrada digl internat dat ei – tenor il rectur dil gimnasi – diversas raschuns. Ei existi inaga ina certa malcuntentientscha visavi scolas cun internat, essend ch’ils geniturs veglien haver lur affons era duront l’jamna a casa. Vitier vegni che las scolas medias seigien repartidas geograficamein meglier e dad aulta qualitad. Era il traffic public seigi daventaus pli efficients. Igl internat seigi – cun 14 000 francs ad onn per mintga scolar – memia cars. Alla scola media a Saint- Maurice studegian varga 1100 scolaras e scolars che vegnan instrui dad 85 magisters. La scola sappi duvrar bein las localitads digl internat per l’instrucziun.

Tenor il procuratur dall’abbazia, Olivier Roduit, mondi cun serrar igl internat ina fetg liunga tradiziun a fin. Ei seigi buca stau ina leva decisiun. La scola media publica da St. Maurice stat vinavon sut l’egida dils canonis regulai digl uorden da s. Augustin.