Fin 4000 novs lieus da rimnada da PET

A fermadas da tram e bus bain frequentadas duai dar fin 4000 ulteriurs lieus da rimnada da PET. Tar bleras fermadas dettia be sadellas da rument. Uschia giaja a perder mintga di in grond dumber da PET – ha ditg il mainafatschenta da «PET-Recycling-Svizra» a la gasetta «Schweiz am Wochenende». En Svizra datti ozendi 50 000 lieus da rimnar buttiglias da PET. Quai tar detaglists, biros, scolas u tar implants da temp liber. Ma anc adina giajan blers pachetadis da PET a perder perquai ch’i sa tschentan en sadellas da rument. PET-Recycling-Svizra parta dal fatg che radund 20% da las 22 000 fermadas en il traffic public èn frequentadas ferm. Grazia al project duaja la quota da reciclar vegnir augmentada per 7% sin 90%.

Mo 56 minutas avant il start ha l’India spustà sia emprima missiun sin la glina, quai pervi dad in problem tecnic. Il nov termin per il start è tenor l’agenzia astronautica da l’India en in mais. Be paucs dis avant il 50avel anniversari da l’emprima tschentada sin la glina vuleva l’India cumenzar sia emprima missiun. Il pajais ha sviluppà bunamain tut las cumponentas sez. Ils custs èn cun radund 124 milliuns euros bass cumpareglià cun auters programs lunars. L’India fiss il quart pajais al qual i gartegiass da sa tschentar sin la glina. Ordavant è quai gartegià als Stadis Unids, a la Russia ed a la China.

Ils schefs da stadi e da regenza da la Germania, la Frantscha e la Gronda Britannia èn s’exprimids communablamain per la cunvegna d’atom cun l’Iran. Els sajan preoccupads che la cunvegna vegnia flaivlentada vinavant sut il squitsch da las sancziuns.