Ursin Tiri, pur, anada 1985, Andeer

Tge munta igl rumàntsch par Vus?

Igl rumàntsch munta par me igl mieus datgea, d’easser an la Val Schons. Que lungatg dat a mei igl santimaint da patria. El s’oda par me tier la famiglia, cumbagn ca bagliaf betga ple adigna rumàntsch cugls geniturs. Mo cugls frars a la glieud ple viglia d’Andeer discur jou adigna rumàntsch. Cun nus giuvens ân igls geniturs adigna bagliafo rumàntsch. Els ân propi sado fadeia ca nus amprandeian rumàntsch.

Co promovez Vus igl rumàntsch?

Jou amprov da bagliafar aschi savens sco pussevel rumàntsch cun la glieud ca se c’i san rumàntsch, ad anquier adigna puspe igls pleds ca se betg agl Pledari. Ascheia amprend jou ear adign’anavànt pleds novs par migliurar igl mieus rumàntsch. Ascheia fa’gl ear plascher scha saint ca se bagliafar ple corectameing a surtut cun daple pleds. Jou anquier igls pleds betg ancunaschaints agl Pledari stampo near agl Pledari online.

Tge avagnir â igl rumàntsch savund igl Voss meni?

Jou ve l’impressiùn c’igl vegn puspe daple ca la glieud, surtut igls giuvens ca san ànc rumàntsch, en partschearts c’igl e anzatge c’igl vala da mantaner ad ân puspe plascher da bagliafar rumàntsch. Igl dat bleara glieud a qua ca bagliafava ple bòld adigna me tudestg, quels antschevan ussa puspe da sadar fadeia da bagliafar rumàntsch, da discutar cun l’egn l’oter ear puspe an rumàntsch, forza ear egn’eada near l’otra cun egn pled falo, mo i amprovan seglmains. Parquegl ve jou egn bùn santimaint pigl avagnir digl rumàntsch. Jou maneg ca nus saveian mantaner el.

www.100onns.ch