In dils pli bials pass dil Grischun

(anr/gv) En dus onns duei il niev tunnel dalla Viafier retica tras l’Alvra vegnir aviarts. Gia ussa fa la lingia dalla Viafier denter Bravuogn e Preda part dall’ierta mundiala Unesco. Igl emprem tunnel construius all’entschatta dil 20avel tschentaner ei en schliet stan. Suenter la construcziun dil tunnel niev daventa il vegl in tunnel da segirtad.

Culla construcziun digl emprem tunnel tras l’Alvra avon biebein 100 onns havess Bravuogn duiu daventar in liug turistic niebel sco S. Murezi. Quella finamira ei buc ida en vigur. Aschia ha il vitg, integraus avon paucs onns ella vischnaunca Bravuogn Filisur, manteniu il caracter original ed ei in liug da vacanzas appreziau. La construcziun dalla via sur il Pass dall’Alvra ed il tunnel tras l’Alvra ha caschunau in svilup, denton era frenau ina liunga era economica.

Culla construcziun dalla via aviarta il 1865 eran numnadamein 50 viturins cun 200 cavals engaschai il temps da stad per il transport da Cuera ell’Engiadina. Il viadi da Cuera a S. Murezi cuzzava 14 uras. La ruta sur l’Alvra era empau pli cuorta che la ruta sur il Gelgia.

pagina 2