«Nossa regiun vo savens an amblidanza»

DA GION NUTEGN STGIER / ANR

Far attent la politica a Coira tgi dat er la Val Alvra davains. Chegl egna dallas fegnameiras dalla suprastanza dall’uniun. Per simplifitgier l’administraziun dall’uniun vign fatg diever d’ena nova plattafurma. En tema è er stada la bova da Brinzauls. Siva d’en onn è Alessandro Broggi, igl impressari da construcziun da Barvogn, alla testa dall’Uniun da commers e mastirants Alvra. Chella uniun tgi reunescha las interpresas dalla Val Alvra, exclus Lai, dattigl gio siva digl 1938. Da preschaint ò ella 38 commembers, siva tgi dus commembers èn sortias cun aveir mido domicil e do se igl affar cun eir an pensiun. Alla radunanza generala a Barvogn èn cumpareidas inclus igls giasts 20 persungas. All’antschatta èn igls preschaints sa regurdos agl patrung-electricist Georg Putzi da Surava, el tg’ò gia da bandunar chest mond avant pacas emdas. El seia sto en commember fitg activ e s’angaschea ferm per l’uniun, ò detg Broggi.

Inscunter cun igls presidents 
dallas otras uniuns

An sies rapport annual ò Broggi menziuno tgi l’uniun vegia piglia posiziun tar la nova lescha da tgira da malsangs e chegl ord vista dalla regiun. S’occupo cun chel tema seia Reto Crameri, igl deputo da Surava, el tgi appartigna er alla suprastanza dall’Uniun da commers e mastirants Alvra. Igl parsoura dall’uniun ò er menziuno tgi igl inscunter cun igls presidents dallas uniuns vaschignas Lai e Surses scu er cugl comite d’organisaziun dall’Expo Casti/Alvra seia sto interessant e nizevel. Nia discurria seia sch’ins less eventual far ena Expo regiunala, alternont ainten en oter li an Surses, a Lai ed an Val Alvra.

Tgirar ples contacts

Broggi ò er communitgia tgi l’Uniun da commers e mastirants Alvra sustigna l’Expo Casti/Alvra cun ena somma da 500 francs. La sia fegnameira pigl nov onn da gestiun seia er da promover igls contacts e barats tranter igls commembers. Anc daple peisa viglia el dar agls contacts cun igls cumegns er per plazzar igls giaveischs digls commembers dall’uniun, ò detg Broggi. Da gronda impurtanza seia da far attent la politica a Coira tgi la Val Alvra davains exista er anc. Chella geia savens an amblidanza sen camp politic cantunal, ò punctuo igl president.

Alla tschertga da novs commembers

Chegl tgi pertotga la tschertga da novs commembers vegian el ed er sies consuprastants da neir pi activs, ò detg Broggi. L’egn u l’oter travagl ainten la regiun seia betg anc commember dall’uniun. Per simplifitgier l’administraziun dall’uniun vign da nov fatg diever d’ena plattafurma tgi sa nomna «Clubdesk». Sa cumprova chella, alloura duess l’uniun surpiglier chella definitivmaintg.

Via Tavo e la Purtenza

En tema tar la radunanza generala è er stada la bova da Brinzauls. Or digl mez digls commembers è neida fatga la dumonda schi la bova vess propi da neir oragiu anfignen Surava e cuatar la veia tge tgi succeda cugl traffic da transit per tots chels d’Alvagni, Filisour e Barvogn ed er igls automobilists tgi vignan da Nagiadegna sur igl Alvra. Igls represchentants digl cantun Jan Kamm e Gion Hagmann on detg tgi da preschaint ins vegia betg en plan B. Previa fiss tgi chels automobilists tgi lessan eir an direcziun Coira vessan dad eir via Tavo e Purtenza anfignen Coira.