Dultsch sco mèl d’aviuls

Da Bernhard Petschen, catechet

Sporadicamein segidel jeu ora a Cuera sin in stan per ina cuminonza cristiana. Per part ei quei giuvens cristians che brischan per Jesus ed enqueran il discuors cun giuven e vegl. Denter auter ha ina giuvna – ch’era en discuors cun ina dunna pli passada – detg ch’ella hagi buca mo petta e caffè, mobein era in vers biblic ch’ei bia pli dultschs che petta. Vers, plaids biblics, bibla?

En la sontga Scartira savein nus leger en il cudisch dils versets las suandontas lingias: «Plaids curteseivels ein sco mèl, dultschs per l’olma e sanadeivels per las giugadiras (Versets 16, 24). Quei cuort verset ord la sontga Scartira tuna propi sco da magliar mèl d’aviuls. Denton astgein nus buc emblidar il coc che stat davos quels plaids. Cheu va ei per la conversaziun denter carstgauns ed il cumportament enviers autras persunas. Plaids curteseivels ein multifars e varionts, han denton in punct central: Els ein visai vi sin discuors curteseivels e sin acceptanza e quei fa bein a tgierp ed olma.

Cura che Jesus ei vegnius arrestaus han ils Romans buca giu bials plaids per el. Ei han detg leffas, spidau, schlagau e marterisau el. E Jesus? El ha rispundiu mo cun plaids da carezia. Entras sia gloriusa misericordia ha el schizun perdunau a ses inimitgs cura ch’ei han crucifigau el.

Quels plaids che Jesus ha detg a nus stuessen nus prender a pèz. Ses plaids ein carezia, curteseivels, gie, els ein sco mèl d’aviuls ch’ins streha sin ina pischutta. Denton, ses plaids da carezia muntan bia dapli. Quels fan buca mo bein al magun, mobein era a noss’olma. Ses plaids curteseivels ein schizun «sanadeivels per las giugadiras», stat ei scret en il cudisch dils versets. Quei che stat scret en la sontga Scartira ei aunc suenter 2000 onns frestg, dultsch per l’olma e sanadeivel per las giugadiras.

Ed ussa, co communichein nus cun nies visavi? Ei nossa conversaziun sco mèl? Quei duess ei esser per principi adina e dapertut aschia, independentamein tgei ureglia che teidla tier a nus. Suenter ils plaids da Diu lein nus s’orientar. Els ein in muossavia per scadin da nus. Gie, ses plaids ein curteseivels, sco mèl, dultschs per l’olma e sanadeivels per il tgierp. Tgei grondiusa empermischun. Dieus seigi ludaus.