Riet Felix (44), manader dal center da documaints d’identità a Zernez

Che importanza ha il rumantsch per El?

Il rumantsch es mia lingua materna ed ha cun quai per mai üna fich grond’importanza. Dürant l’infanzia ed il temp da giuvenil nu m’haja interessà uschè ferm per linguas, neir brich pel rumantsch. Pür cun tuornar in Engiadina es creschü l’interess per mia lingua materna.

Co promouva El il rumantsch?

Eu promouv il rumantsch cun discuorrer e scriver plü bain pussibel vallader. Implü vain Gion Tscharner sco promotur ed eu sco assistent tecnic sviluppà avant ün pêr ons ils pledaris in vallader e puter. Quistas datotecas as poja dovrar per far la correctura ortografica dal text chi s’ha scrit cun programs da computer.

Che avegnir ha il rumantsch?

Scha’ls idioms rumantschs pon gnir instruits amo dürant plüssas generaziuns in scoula, lura daraja il rumantsch eir amo in 100 ons. Eu am giavüsch quai pel 200avel anniversari da la Lia Rumantscha.

www.100onns.ch