Sent, Flem – e Vaz

La fin d’emna ch’è gist passada pudess ins metter bain sut l’ensaina da las dunnas, silmain en il Grischun. Per l’ina hai dà gronda festa a Sent per la novelegida presidenta dal Cussegl grond, Aita Zanetti (pagina 7). Ed a Flem, a la radunanza da la Surselva Romontscha, èn sa preschentadas l’emprima giada cuminaivlamain las duas candidatas per in co-presidi da la Lia Rumantscha, Urezza Famos e Gianna Luzio, (pagina 3). Damai: in viva sin las dunnas!

«I gira» u «i marscha», pudess ins damai dir en connex cun la represchentanza da las dunnas en gremis publics. Però adatg, tranter costums, musica e festivitads per 50 onns dretg da vuschar per las dunnas, pudess vegnir survis insatge: I dat anc bler da far! E quai cumprovan gist quests ultims dis da l’avust 2021. Intgins exempels:

Ier dumengia hai dà elecziuns communalas a Vaz (pagina 8). Cun trais candidats. Tuts umens. Era tar la suprastanza hai dà per ils quatter posts quatter candidats. Tuts umens. L’emna passada ha gì lieu la sessiun dal Cussegl grond, puspè ina giada en la sala usitada a Cuira. Però er là datti in maletg fitg masculin: Mo in tschintgavel dals commembers dal parlament èn dunnas. E davantvart, tar ils sezs dals commembers da la regenza grischuna datti actualmain ina quota da dunnas da 0%.

I dat damai anc lavur, dal livel communal enfin si en las sferas cun aria pli fina en la politica grischuna. Quest’emna, ils 2 da settember, datti a Berna per exempel ina festa en Chasa federala. Igl è ina festa per sa regurdar dal dretg da vuschar per las dunnas conquistà avant 50 onns. Quai èn impurtants muments per adina puspè render conscient a la cuminanza che l’egualitad n’è anc betg cuntanschida. I dovra pajas egualas, structuras dal di per famiglias, models da lavur flexibels, ina ferma promoziun da dunnas etc. Ils plazzals da lavur èn enconuschents. Cun auters pleds: Er sch’i dat a Flem ed a Sent signals positivs per las dunnas, datti dasperas anc (memia) blers signals sco a Vaz.