Ena donna scu cuntercandidata

Damai dattigl ossa an Surses gio treis persungas tgi von aint igl cumbat electoral.  An ena communicaziun da medias screiva l’Allianza digl Center Surses tg’ella less a parteir digl schaner 2022 puspe esser represchentada aint igl Cunsegl grond. Per chella fegna­meira ò la parteida locala nomino la poura Sandra Baltermia-Guetg da Salouf scu candidata pigl parlamaint cantunal. Ella vegia l’experientscha per davantar ena deputada capavla cun esser stada scrivanta communala a Sur ed a Salouf. Ultra da chegl seia ella er stada ples onns commembra digl cunsegl d’administraziun dalla Banca Raiffeisen Grischun Central. An taimp parzial magna ella er l’administraziun digl Cumegn-baselgia catolic Surses.

Cun la candidatura dalla donna da Salouf pigl Cunsegl grond èn ossa ancunaschaintas treis persungas dalla val tgi lessan eir a Coira aint igl parlamaint cantunal. Dasperas Sandra Baltermia-Guetg èn chegl anc Adrian Ballat da Savognin, suprastant digl cumegn Surses, tgi candidescha per la PS ed igl electorinschignier Fabio Luzio da Cunter, tgi la PLD tarmetta aint igl cumbat electoral. Da preschaint è Surses represchento aint igl Cunsegl grond cun en mandat antras Gaby Thomann-Frank (PLD) da Parsonz. Tgunsch pussebel tgi a parteir dalla proxima perioda da legislatura ò Surses puspe dus sezs aint igl parlamaint cantunal. Per las elecziuns communlas digl cumegn Surses alla fegn da settember 2021 ò l’Allianza digl Center Surses nomino Ursus Sonder da Salouf per la cumischung da gestiun. Cun Lothar Künzli da Savo­gnin dattigl gio en candidat pigl post ainten la cumischung da gestiun tgi vign liber cun sa retrer Marco Jäger da Sur. (fmr/gns)