Las «Rodas» vegnan in Val Müstair

In gövgia saira, ils 2 da settember 2021, dà Corin Curschellas a Valchava illa Chasa Jaura ün concert cun seis ensemble actual «Rodas». Quel as cumpuona da l’accordeonista Patricia Draeger, da la cellista Barbara Gisler e da la chantadura svessa, da Corin Curschellas. La fuormaziun exista daspö l’on 2016 ed as vaiva constituida insè per ün’unica rapreschantaziun al «Alpentöne Festival». Intant ha «Rodas» fa inavant seis gir e seis concerts. Sunadas e chantadas vegnan chanzuns popularas rumantschas, chanzuns gualsras, canzoni dal Grischun talian sco eir chanzuns in dialect tudais-ch da Cuoira, scrittas da Corin Curschellas svess.

Corin Curschellas vain eir intitulada la « grande dame » da la chanzun rumantscha – impustüt perquai ch’ella s’ha occupada intensivamaing cul chant popular rumantsch. A bleras chanzuns veglias ha ella dat i’l decuors dals ultims ons – in diversas fuormaziuns e variaziuns – ün nouv vesti musical, ün vesti arcaic-modern e sgiaglià. (cdm/fmr)