Nov schlàntsch par l’Uniùn Sutselva rumàntscha

L’Uniùn Sutsevla rumàntscha â saraduno igls 28 d’avust 2021 par salvar la radunànza generala c’â gieu liac la davos’eada igl matg 2018. Passa 20 parsùnas ân cato la veia an tgea da scola viglia a Pignia. La grànda part digls puncts tractos â caschuno nignas discussiùns: igls quents digls ons passos en vagnieus prieus par bien a pigl actuar demissiunànd, Otto Denoth da Masagn, e’gl vagnieu eligieu Gian-Marco Beeli da Cuira a Maton. Rico Michael dad Andeer (president) a Gian Catrina da Pignia (cassier) fan venavànt part da la suprastànza.

Tgi e l’Usr?

L’Usr e vagnida fundada igl on 2006, cun la leztga dad administrar egna part digls daners ca Wieland Clopath da Lon veva relascho pigl rumàntsch an Sutselva. L’uniùn â nign program anual a funcziunescha pigl mumaint pletost sco fundaziùn ca sustegna projects ca promovan igl rumàntsch an Sutselva. Davent da quest on par exaimpel dat igl igl figl sgulànd «Novas par la Sutselva» c’infurmescha la populaziùn davart diferaintas purschidas sutsilvanas. Tanor igl tschantamaint da l’uniùn ân igls cumembers da pajear nigna contribuziùn anuala a tut igls Sutsilvans a tut las Sutsilvanas fan automaticameing part da l’uniùn. L’uniùn e betg afilieada a la Lia Rumantscha, quella posiziùn â l’Uniun Rumantscha Grischun Central (URGC). Quegl munta ca las contribuziùns da la Lia Rumantscha van betg a l’USr mobagn a l’URGC.

Ancuretg: ideias frestgas

Tutegna vut l’USr catar nov schlàntsch a davantar egn’uniùn impurtànta par la regiùn da la Sutselva. Egn motiv e quel ca l’URGC, ca rapreschainta igl antier antschies da Surmir a da la Surselva, â da tgirar dus idioms c’en betga propi datier l’egn da l’oter. Durànt la radunànza en vagnidas discutadas anzaquàntas pussevladads da render ple atractiva l’uniùn. A la fegn e vagnieu dezidieu, c’egna grupa da lavur degi s’ocupar durànt igl on proxim cugl futur ad igl curs da l’USr. Suainter la radunànza generala ân igls partizipànts giudieu egn aperitiv survieu da Gundi Demarmels da Pignia. Plenavànt â Casper Nicca da Casti preschanto sieus nov project da video, agl qual el lascha raquintar istorgias persunalas ad experienztgas da veta dad anzaquànts abitànts digl antschies digl Parc natiral Bavregn. Schiprest ca tut las amparadas aviertas en sclaridas, de igl project ear dalùnga vagnir preschanto a l’antiera populaziùn.