Museum Stamparia Strada cun nouvas forzas
Stampaduors e tipografs professiunals demonstraran in avegnir co chi gniva stampà cullas maschinas veglias i’l museum Stamparia Strada. Daplü d’üna mezza dunzaina da persunas han interess d’esser activas i’l museum a Strada.
Las ultimas sondas d’eira blera vita i’l Museum Stamparia a Strada. Il böt da quists duos arrandschamaints d’eira da procurar per cuntinuità i’l museum regiunal (vair box): «Eu main quist museum daspö l’on 1987», ha dit Gian Häfner, «uossa n’haja 82 ons e less perquai planet am retrar.» Thedy Gut chi fa part dal cussagl da la Fundaziun Stamparia Strada ha declerà che chi hajan fat per chattar successuors per el «ed eir per dvantar commembers dal cussagl da fundaziun» e procurar pella cuntinuità.
Cul sustegn da Museums Grischuns
Insembel cul figl da Gian, cun Georg Häfner chi presidiescha la Fundaziun Stamparia Strada, s’ha el miss a la tschercha da persunas chi vessan forsa interess dad esser activas i’l museum a Strada: «No vain gnü eir il sustegn da Museums Grischuns e vain chattà ün bel nomer da persunas chi vessan plaschair da far quai», ha infuormà Thedy Gut, «p.ex. Jon Armon Caflisch, Jon Candrian, Letizia Könz e Maria Vital.» Implü hana chattà cun Ottiglia Augustin, Chatrina Caviezel e Barbla Sulser eir a trais duonnas chi sun prontas da far la guidas la sonda tras il museum. «Uossa esa da verer co chi’s scumparta las differentas lavuors», ha declerà Thedy Gut, chi d’eira plü bod il CEO da las Zürisee-Medien, «no eschan persvas dad esser sün buna via.»
Cun profis vi da las maschinas
«La Stamparia Strada es ün museum cun maschinas da stampar veglias, cun quellas san lavurar quellas persunas chi han imprais ils mansters da stampadur o tipograf», ha’l cuntinuà, «mansters chi mouran oura.» Cur cha’l museum eir da l’art naira Graphos ad Uster es gnü serrà ha Thedy Gut scrit a quellas persunas chi demonstraivan co chi gniva stampà plü bod: «Eu n’ha dumandà schi nu vessan interess da dovrar lur capacitats professiunalas eir quia a Strada.» Seis intent d’eira d’avair uschea amo ün pêr ons profis chi muossan a la glieud co chi’s lavuraiva cun quistas maschinas. «Quatter fin tschinch d’els han respus chi fetschan quai ed ad els vaina dat las ultimas duos sondas l’occasiun da provar oura las maschinas chi sun qua a Strada.» Quista sonda d’eiran illa Stamparia Strada ils stampaduors pensiunats Felix Faccini e Karl Lang.
Ün bain cultural d’importanza naziunala
Da l’on 1680 ha Nuot Cla Janett, il stampadur principal da la «Sacra Bibla» da Scuol, decis da drivir a Tschlin ün’aigna stamparia. Dal 1689 ha’l fat müdada ed installà quista ufficina a Strada. Fin da l’on 1881 esa gnü stampà qua cun pacas interrumpziuns üna blerüra da cudeschs in rumantsch. Dal 1987 es gnüda constituida la Fundaziun Stamparia Strada. Quella ha fat our da la chasa S-charplaz ün museum da l’art naira cun maschinas da stampar veglias. L’exposiziun permanenta muossa co chi gniva stampà qua, ma eir co chi gniva vivü da quel temp in quista veglia chasa engiadinaisa. Regularmaing vegnan sportas eir exposiziuns extraordinaras. Il museum figürescha sülla glista da bains culturals d’importanza naziunala.
Gust da leger dapli?