Ballapei: Trun/Rabius culs proxims treis puncts

Gest treis giugadurs ein seblessai el davos giug encunter Sargans, aschia ch’ils trenaders dil CB Trun/Rabius Philippe Vincenz e Donat Albin ein sfurzai da far midadas ell’equipa. All’entschatta dalla partida a Weesen ei quei era veseivel. L’equipa da casa stat ault ed emprova da metter sut squetsch l’equipa dalla Cadi. Trun/Rabius tegn denton pétg e va en avantatg ella 20. minuta entras Patrizio Decurtins suenter in bi conter. Tochen pausa semida nuot vid il resultat. Suenter il te emprova Weesen cun variaziun e tempo d’egalisar, mo Trun/Rabius rispunda beinspert e va ella 52. minuta cun 2:0 en avantatg entras Gianin Derungs. Quei ei empau in schoc per l’equipa da Weesen. Gie, cuort suenter schizun la schanza per Gianin Derungs d’alzar sin 3:0, mo Martin Mächler tegn cun in bi reflex. Weesen fiera uss tut anavon, mo la defensiun ed il goli dil CB T/R muossan in’ulteriura ga ina grondiusa prestaziun e lubeschan negins gols quei di. Malgrad che Weesen ei sil davos plaz ella tabella ed ha aunc sittau negins gols muossan els ina buna prestaziun. Trun/Rabius ha – semegliont al giug encunter Sargans – giugau defensiv fetg stabil ed offensiv nezegiau las schanzas.

3. ligia gruppa 1

Weesen – Trun/Rabius 0:2 (0:1)

Moos, Weesen – 100 aspectaturs.

Gols: 20. Patrizio Decurtins, 52. Gianin Derungs.

Trun/Rabius: Mauricio Cathomas; Damian Schmed, Livio Janka, Ramon Orlik, Sandro Orlik; Mathias Flepp, Denis Monn (74. min. Fabio Caduff), Clau Berther (53. min. Silvan Muoth), Jonas Beer (46. min. Salvatore Stagliano); Gianin Derungs (87. min. Philippe Vincenz), Patrizio Decurtins.

Weesen: Martin Mächler; Andreas Briker, Patrick Widmer, Tuncer Niederberger, Dario Büsser; Michel Büsser, Mario Thoma, Romano Böni, Robin Martinelli, Perry Gamba; Roman Eicher.

Remarcas: Trun/Rabius senza Remo Alig, Beat Cadruvi, Orlando Monn, Daniel Pfister e Mirco Pfister. Corners: Trun/Rabius 4, Weesen 8.