La Senda Clemgia dà daplü da far co previs
Las strasoras da l’on 2017 han schlavà parts da la Senda Clemgia fin giò sül grip e desdrüt punts. Adonta da lavuors intensivas per tilla refar po quella senda gnir drivida pür quist on chi vain.
La senda aint da la chavorgia da la Clemgia sül territori da la fracziun Scuol es üna da las sendas las plü bain frequentadas. Tant ils giasts sco eir blers indigens fessan jent la spassegiada sün quista senda. «Davo cha las strasoras da l’on 2017 vaivan procurà per ün’auazun uschè gronda chi sun gnüdas strattas sun sai punts e schlavadas giò parts da la senda fin sül grip vaina stuvü serrar per sgürezza quista senda», ha dit Arno Kirchen chi maina ils uffizis tecnics dal cumün da Scuol a la FMR, «il problem es cha las costas grippusas sun labilas, da prümavaira crouda adüna blera crappa fin giò’l fuond da la val.» Davo cha la radunanza cumünala vaiva appprovà ün credit da 460 000 francs ha il cumün cumanzà l’on passà cullas lavuors per refar e sgürar la Senda Clemgia. Uossa ha’l però comunichà i’l Mas-chalch cha quistas lavuors hajan stuvü gnir interruottas.
«La causa sun stattas nouvas auazuns»
Sco cha’l cumün scriva esa previs da refar la senda tanter Vulpera, Avrona e’l Plan da Funtanas. Ella dess pudair servir sco senda alpina (signalisaziun cun blau ed alb). «Quai dess gnir fat infin chi’s po decider definitivamaing che chi capita culla Senda Clemgia.» Cha las lavuors hajan uossa però stuvü gnir interruottas causa nouvas auazuns, infuorma il Mas-chalch e scriva chi haja gnü lö d’incuort üna visita oculara: «In quist’occasiun s’haja constatà cha las strasoras d’avant quatter ons ed il temp davo sainza mantegnimaint da la senda han ruinà grondas parts da quella.» Chi nu saja perquai pussibel da tilla refar a fin e dovrar amo quist on, comunichescha il cumün. Tschertas lavuors gnaran fattas d’utuon ed otras pür da prümavaira chi vain: «Il böt es da pudair dar liber la senda in gün 2022.»
Retard eir pro la Punt da Gurlaina
I’l Mas-chalch orientescha il cumün da Scuol eir davart il stadi actual da las lavuors vi da la Punt Gurlaina: In marz sun gnüdas exeguidas las lavuors las plü necessarias per pudair garantir la sgürezza da la punt. «In seguit s’haja rinforzà fin la mità da lügl la construcziun principala cun rimplazzar ils elemaints d’atschal dannagiats.» Lura han cumanzà las anticorrosivas: La substanza correspundenta esa da dar sü a man in quatter vettas. Pro trid’ora nu po quista lavur gnir exeguida. Finidas sun duos etappas a 15 meters, ün’ulteriura es in preparaziun. Oriundamaing d’eira previs da drivir la punt in november 2021. «La firma incumbenzada ha comunichà cha’l temp nu basta per quista lavur pretensiusa», as legia i’l Mas-chalch. Chi gnia lavurà eir dürant l’inviern, las lavuors saran a fin la mità da marz 2022. «I’s fa quint cha la punt possa gnir drivida la mità da gün 2022.»
Gust da leger dapli?