«Glistas da far»

Venderdi damaun: in quadrin plus l’in u l’auter chavazzin è gia è formulà mes emprim pensum per oz. Ed uschia cuntinuesch jau: «respunder il mail dad Aron Moser», «emplenir il formular da spesas», «scriver l’artitgel da Mirko Baselgia», «termin cun Kim Osinga», «studegiar las statisticas da la populaziun»,…ed uschia s’emplenescha mes bloc da notizias per vaira dapli che la mesadad.

Jau era adina in fan da las «glista da to do», ni per bun rumantsch «glistas da far». Però il pi tard cun il cumenzament sco redactura tar la FMR èn ellas ina part integrala dal mes mintgadi.Mia flaivlezza per las glistas ins pudess tgunsch definir sco dependenza. Mussament è mes cudesch da notizias privat – ina seria da glistas èn da chattar lien. Puncts fitg differents, «bels patratgs e bunas ideas» sco chi para sch’ins dat ina sfegliada. Emprim confess per oz: vairamain exequì hai jau strusch ina terza. Igl èn chaussas che jau n’hai atgnamain ni gust ni schlantsch da far. Tgi nettegia gugent fanestras u frestgera? Cun excepziun da mia mamma che vegn schizunt da libra voluntad a gidar nettegiar mias fanestras n’enconusch jau betg olma. E puncts sco «nettegiar il velo» u «far la duscha» n’hai jau strusch ina giada nudà sin ina da las numerusas glistas. Pertge? Cun ponderar e studegiar suonda mes segund confess: tut quellas glistas che existan gia dapi onns eran ed èn plitost per la schletta conscienza. Forsa in fenomen psicologic, quai na sai jau betg. Però d’ina chaussa sun jau segira: mo il nudar dal singuls puncts ma dat in tschert sentiment d’almain avair fatg ina part da la lavur, forsa be ina mieula, ma tuttina – er sche las fanestras èn anc adina tuttina malnettas sco avant in mez onn.

Tge che pertutga mia lavur tar la FMR ha la glista in’autra muntada. Ella ma gida vairamain d’avair la survista per la lavur autonoma sco schurnalista. Ed uschia sai jau dir per oz – e quai cun buna conscienza: «respunder il mail dad Aron Moser» fatg, «emplenir il formular da spesas» fatg, «scriver l’artitgel da Mirko Baselgia» fatg, «termin cun Kim Osinga» er fatg. E tge che pertutga «studegiar las statisticas da la populaziun», quai vegn ad esser l’emprim punct per la glista da glindesdi.