Inschigniers sursilvans, nua essas?

L’instituziun ha surviu ils davos 30 onns sco center per requirents d’asil dil cantun. Il casament imposant cun sias varga 40 stanzas ei in’instituziun affilliada agl uestgiu da Cuera. L’economia duess buca esser ina religiun, ella ei denton quei che porta il paun da mintgagi. Il num engles «Surselva Impact Lab» tuna plitost sco in medicament. Ina nova fabrica da medicaments ei il Löwenberg buca. Ina medischina en fuorma d’impuls drova la Surselva denton urgentamein.

La nova fabrica d’inschigneria survescha a quei scopo. Il labor d’ideas dil Löwenberg vul sustener in saun svilup ella regiun. Buca per nuot han ils fundaturs mess il num «Surselva» davontier. Surselva Impact Lab ei ina fuorma pli extendida da promoziun economica. Nossa regiun drova impuls. La retscherca che la Regiun Surselva ei vidlunder da far (mira www.regiun-surselva.ch) puntuescha la schanza ch’il casti da Schluein porscha ils proxims onns.

Il Löwenberg duei daventar ina noziun enconuschenta sur ils cunfins. Ei fa buca surstar ch’il casti s’empleina puspei suenter dus onns. Igl ei denton impurtont ch’il guvernagl da quei grond laboratori resti ella regiun. Gliez ei essenzial pils contacts cullas autoritads ed era culla populaziun. Ins sto far in grond cumpliment al promotur dall’economia dalla Surselva. Quei che maunca aunc ussa a Surselva Impact Lab ein ils giuvens inschigniers (masculin sco feminin) ch’ein carschi si ella regiun, che han denton bandunau quella. Daco buca returnar e realisar cheu il plan gagliard? Gest ier han las gasettas dalla dumengia rapportau ch’ils marcaus piardien populaziun. Adina dapli glieud banduna ils centers e van a habitar e luvrar ella periferia. Leu carmala la buna qualitad da viver, ins sa evitar hectica e colonnas. Grazia alla digitalisaziun eis ei negin problem pli da habitar e luvrar en Surselva. Sche lu, buna glieud, buca targlinei. El Löwenberg ha ei aunc plaz per vus. Ils proxims 30 onns savessen daventar zun interessants.