Fieus d’admoniziun duain far attent sin las difficultads cun lufs problematics

Cun fieus d’admoniziun en l’entira Europa vegn fatg attent quest venderdi, ils 17 da settember 2021 sin la problematica pertutgant lufs agressivs. Tals fieus èn er previs en plirs lieus dal chantun Grischun, tranter auter a Maton, in lieu en il mez dal triep dals lufs dal Beverin. Sco quai ch’il president da l’Uniun dals purs da Schons, Mathias Camenisch scriva en ina communicaziun als meds da massa, pericliteschan lufs problematics pli e pli l’alpegiaziun. Là nua che animals da chasa vegnan tegnids, procuran chauns per lur protecziun. Quels èn lu puspè da dischavantatg per il turissem, saja viandants u er ciclists. In ulteriur problem pertutga las alps sezzas. Vegnan quellas betg chargiadas e pasculadas en l’avegnir, perdan ellas la biodiversitad. Cun ils fieus duai vegnir fatg attent sin quels problems. Els vegnan envidads allas 19.30.