«La finamira ei da serangar denter ils 20 megliers»

Dapi dus onns ei Vital Albin (23) profi da mountainbike. Il Lumnezian ambizius ei commember dil cader A da cross country e dil team Thömus RN Swiss Bike. A quei team appartegn era Mathias Flückiger, sper Nino Schurter il mument il meglier Svizzer. Sco junior ha Vital Albin contonschiu pli u meins tut quei ch’ins sa contonscher en lezza vegliadetgna. Il ciclist ch’ei carschius si a Tersnaus el medem vitg sco Nino Schurter ei staus pliras ga campiun svizzer, ei staus ina ga secund ed ina ga tierz al campiunadi mundial sco era treis ga secund al campiunadi d’Europa. Al campiunadi d’Europa 2014 dils ciclists sut 17 onns eis el schizun staus sisum il podest. Al campiunadi d’Europa dall’elita da quest onn ha Vital Albin occupau il bien 14avel rang. El Cup mundial U23 eis el daventaus duas ga tierz. Quellas rangaziuns e l’ambiziun dil profi che habitescha a Cuera laian secapescha spitgar dabia pigl avegnir.

25avel a Lai

Allas concurrenzas dil Cup mundial da cross country questa stad ei Vital Albin serangaus adina denter ils 25 e 33 megliers. Il meglier rang – il 25avel – ei reussius ad el a Lai nua ch’el ei partius l’emprema ga tier l’elita. Al campiunadi mundial eis el staus uonn l’emprema reserva. Cun quella tschunavla stagiun tier l’elita ei il Lumnezian cuntents. «Entochen ussa eis ei stau prestaziuns solidas. Ei astgass esser stau intechet meglier, mo jeu sun cuntents», di il giuven sportist ch’absolva il studi da giurisprudenza sper la carriera sco biker. Ella concurrenza da cross country la proxima fin d’jamna els Stadis Uni vul el contonscher la finamira stagiunala: «Jeu less seplazzar denters ils 20 megliers. La finamira da l’auter onn ei da contonscher regularmein rangs denter ils 20 megliers dall’elita, ina ga ni l’autra era denter ils diesch megliers.» Per la fin da questa stagiun less Vital Albin aunc absolver cuorsas dil Cup svizzer a Ligiaun e Schaan el Principadi dil Liechtenstein. La dumengia vargada eis el dil reminent era staus en acziun alla cuorsa da Cuera ad Arosa. El ei staus il meglier Grischun, terminond la cuorsa sil novavel rang.

Filar vid ils detagls

Per contonscher la finamira da serangar denter ils megliers dil mund vesa Vital Albin ch’ei aunc adina «losch commember» dil Club da velo Surselva, potenzial da migliur empau dapertut: «Ei drova segiramein aunc dapli cundiziun ed aunc meglier tecnica. Sch’ins vul dir aschia sun jeu negliu mega ferms mo era buca fleivels.» Denter 10 e 30 uras eis el sin velo jamna per jamna en trenaments, leutier vegnan las cuorsas. Ils trenaments planisescha el cul trenader Fabian Neustöcklin. Ina ga ni l’autra treneschi el era cun Nino Schurter che habitescha medemamei a Cuera. Igl unviern ein els dus era magari da cattar communablamein sin loipa. Cuorsa liunga e novissimamein era parasgular ein las activitads sportivas che Vital Albin appreziescha sch’el sesa buca sil bike. Per esser semtgaus bein per las empremas cuorsas stagiunalas da l’auter onn ha ei num trenar atras pli u meins igl entir unviern: «Lu essan nus per part era en tiaras cauldas. Lu trenein nus pil pli el team ni l’equipa naziunala.» Da Mathias Flückiger, siu prominent cumpogn da team, sa Vital Albin secapescha profitar: «Pertuccont il trenament buca exnum, mo surtut pertuccont il material. Biras sponsurs vulan sustener lez sco in dils megliers dil mund, ed aschia profitein era nus da quei el team entras meglieras resursas. Quei ha lu la fin finala era in effect finanzial indirect.»

«Sil velo per buca esser persuls a casa»

Vital Albin ch’ei naschius ils 31 da fenadur 1998 ei carschius si a Tersnaus. Silla damonda dapi cu ch’il velo seigi siu accumpignader di el spontanamein: «Quei ch’jeu seregordel. Inspirai dalla famiglia Schurter mavan mes frars era a trenaments e concurrenzas da bike. A mi eis ei restau nuot auter ch’era far quei, cass cuntrari fuss jeu staus persuls a casa.» Cun sis onns hagi el absolviu l’emprema cuorsa. Ses geniturs erien buca quels dil bike, mo els seigien vegni fascinai per quei sport entras ils Schurters e lu era spert ils success da Nino Schurter sez.