Sil conto spetgan 800’000 francs

L’uniun Pro Flem Cassons ha tarmess a ses 1750 commembers il rapport annual. L’uniun ha aunc adina sin in conto serrau bunamein 800'000 francs.

parter

Avon diesch onns, ils 30 da settember 2011, haveva l’uniun rimnau 442’000 francs. Lu ha il barometer fatg in grond segl ensi. Ils 4 da matg 2012 eri la summa da 961’600 francs. E treis meins pli tard, ils 16 d’uost 2012, ha l’acziun surpassau la marca magica d’in milliun francs. Tons daners haveva l’uniun rimnau per sustener la gruppa Arena Alva. Lezza haveva communicau ch’ins stoppi sanar la pendiculara Naraus-Cassons. Senza ina suga nova renoveschi gl’Uffeci federal da traffic buca pli la concessiun. Daferton ein nov onns vargai e l’uniun Pro Flem-Cassons s’engascha en tut in’autra direcziun.

Suprastonza communala fa plascher

«Nies 12avel onn d’uniun ei staus cumbinaus cun bia eveniments controvers», scriva la suprastonza dall’uniun en siu rapport annual. Il president Arno Kruker e ses consuprastonts Roger Langhi e Rainer Riedi rendan attent ch’ins hagi actualmein dapli speronza che malsegirtad. Ils davos onns ha l’uniun battiu cun perseveronza che la gruppa Arena Alva prendi risguard silla vart da Flem cun arver il territori tdalla Arena tectonica Sardona. Malgrad tuttas stentas e siu potenzial da commembers ha l’uniun buca saviu impedir la demontascha dalla cabina Naraus-Cassons. Dapi lu ein ils daners per la suga, aunc adina deponi sin in conto serrau. «Ei fa grond plascher che 1750 commembers ein restai fideivels e ch’il conto dalla suga ei aunc adina dotaus cun 800’000 francs», constatescha la suprastonza. Gronda satisfacziun fetschi era la nova suprastonza communala, quella sedetti gronda breigia da communicar a moda transparenta ed exemplarica.

L’uniun retscheivi finalmein fetg buns signals che muossien ch’ins contonschi la finamira dad arver puspei Cassons. Culla suprastonza communala ed ils responsabels dalla gruppa Arena Alva sappien ins discuorer, tuts muossien la bunaveglia da far vinavon cul project Flem-Foppa-Segnes-Nagens. Tenor la planisaziun duei quei toc esser semtgaus silla stagiun d’unviern 2022/23. Gl’onn 2023 vegness, sche tut va tenor plan, la lingia Segnes-Ils Cugns realisada.

Quei che la Pro Flem-Cassons deplorescha ei ch’ins sto unfrir la sutgera Foppa-Naraus. «Malgrad che quella regiun ei fetg populara, mo nus vulein buca sefixar sin quella pretensiun e buca periclitar il plan da termins dils implonts novs». La staziun da muntogna Ils Cugns ei rodund 200 meters pli bass che Cassons. La suprastonza dall’uniun vul evaluar las pusseivladads ch’ei dat da colligiar Ils Cugns cul Fil da Cassons. «Cul svilup ch’il project pren definitivamein ussa, sperein nus da saver proponer ina alternativa che fa senn pils daners ch’ein sil conto per la suga», finescha la suprastonza da Pro Flem-Cassons.