Betg tschient

Grazia a la Südostschweiz èsi uss cler: 74% dals Grischuns na pon strusch spetgar sin l’emprim fratem da chamutsch sin il taglier! Genial, navair? Il rest è mettain vegis, vul dir exots, u forsa schizunt tals che s’empatschan in quex da la buna cuschina, vul dir ignorants. Sezs la culpa. Lura datti dapli per nus auters!

N’è quai betg charin che nossas medias intercureschan di per di cun uschè stimulantas dumondas nua che ans dola il stumi? Jau ma sent en mintga cas prendì total serius, main sulet, super integrà, e quai fa bain. Cunzunt en temps difficils sco uss. Grazia fitg, mamma Somedia. Bun, forsa tschentass jau mintgatant dumondas in pau pli directas sco per exempel: Dastga ina cussegliera naziunala provocar e derasar nunvardads sco ella vul en la SO? Aber quai n’interessescha forsa betg tanta glieud. E quai na fiss mettain era betg avunda integrativ.

A propos, datti per l’integraziun in meglier factur ch’il resultat da l’evaluaziun da talas dumondas? Datti insatge pli bel che far part da la maioritad (p.ex. dals amaturs da charn chamutsch)? Strusch. Gea, en quels muments sun jau cumplainamain en pasch cun noss temp da cifras, statisticas e pertschients. Anzi, jau giaud perfin ch’ozendi mintga toffa vegn mesirada e valitada! Per mai n’èn cifras e pertschients nagut auter che la pura vardad. L’evidenza nair sin alv. Stgisai, ma la mesadad plus in è bain il sulet che quinta en ina democrazia sco qua tar nus. E, be per dir, jau sai era viver tiptop sco diagram da petta ambulant. Definitiv.

Perquai hai jau er in nar plaschair da l’iniziativa da 99% dals Jusos. Guardai be: Nus essan 1 pertschient ritguns ch’ins sto mulscher, e 99 pertschient povers che vegnan lura indemnisads cun quel latg. Gratis e franco. N’è quai betg tschient pertschient persvadent? E social? E vus pudais pir anc sezs far la controlla en vossa vischnanca. Eviva la chatscha sin nababs, in allegher gieu da cumpagnia, dad 1 enfin 99 onns!

A Calanca, per exempel, cun exact 200 abitants è il cas cler, ils dus milliunaris èn spert chattads. Cun Medel (355 abitants) pudessi vegnir in zic pli hanà, aber cun in pau buna veglia e rundar si u giu stuess quai schon ir, u betg?

Mo donn ch’ils adversaris da l’iniziativa quintan cun bler dapli ritguns che vegnissan mulschids e manegian ch’ins stuess perquai refusar l’iniziativa. N’èn quels forsa betg tschient? Nua essas vus, charas partidas burgaisas e cumpagnia, dapli milliunaris dat bain dapli raps en cassa, mann! Ma pazienza. Per dir la vardad, in zic donn fissi schon per il gieu.